Kolasib-ah khauh taka inkhuahkhirh rel

Nimin khan Kolasib DC Dr H Lalthlangliana hoin DC conference hall-ah Kolasib chief medical officer Dr Lalhlimpuia, Kolasib Sub-Hqrs. YMA hruaitute leh Kolasib Town Joint VLTF hruaitute an ṭhukhawm a, inkaihhruaina khauh lehzuala kalpui an rêl.

Dr H Lalthlangliana chuan, an district chu state ṭhenawmte nena inkalpawhna hmunpui a nih angin hripui vei hmuh thar zinga 33% chu luhkaa screening point-a hmuh chhuah anga ngaih theih a nih thu a sawi a, "Kar liam ta chhunga hri kai dan en hian, ni tin za zelah mi pariat kai thar awm anga hrût rual theih a ni," a ti.

Hripui vei thar awm dan enin, Kolasib-ah ziaawm lam a pan mek anga ngaih theih a nih thu sawiin DC chuan, "Hri inkai darh theihna laka fimkhurna hi mahni in chhungkhur ṭheuha kan inenkawlna aṭanga bul ṭan tur a ni," a ti a; hripui veite chu hlauthawng leh chîâi lo a, mithiamte'n inenkawl dan tur an tihte zawm turin a chah.

Kolasib CMO chuan, an district-ah kum 18 chung lamte ngawrh takin vaccine pek zel a nih thu a sawi a, "70% hnenah vaccine kan pe tling ṭêp tawh anga chhût a ni," a ti.

Ṭhutkhawmah hian inkhaihhruaina khauh lehzuala kalpui a nih theih nan executive duty dah belh te, hrui pawh chhunzawm dan tur te, VLTF ex-gratia chungchangte leh hripui dona kawngah YMA Sub-Headquarters nen thawhho zel dan turte sawiho a ni.