ASF vangin vawk 14,440 thi tawh
Vawk pùl hri, African Swine Fever (ASF) avangin nimin thleng khan Mizoramah ASF vangin vawk 14,440 a thi tawh a, khua/veng 187 chu ASF infected area-ah puan a ni tawh.
Animal Husbandry & Veterinary department chhinchhiah danin, Mizorama ASF vanga vawk thi tamna ber chu Aizawl district a ni a, infected area 89 awmin, vawk 5,658 a thi tawh. Aizawl district-a ASF infected area 89 zinga 61 chu AMC huam chhunga veng hrang hrang a ni.
ASF kái vawk hmuh hmasak berna leh vawk thi awmna hmasa ber Lunglei district-a Lungsen khuaah nimin thleng khan vawk 757 a thi tawh a, Mizorama ASF vanga vawk thi tamna ber khua a ni mek.
AH&Vety hriatpuinain ASF infected area 187 zinga 69-ah vawk 4,063 suat a ni tawh a, ASF infected area páwn lam khua/veng pasarihah vawk 120 suat a ni tawh bawk. ASF vanga vawk suat hi Mamit district-ah tam berin, 1,381 tihhlum a ni tawh a; Champhai, Kolasib, Lawngtlai, Saitual leh Khawzawl district-ahte vawk suat a la awm lo.
ASF infected area-a puan loh khua/veng 83-ah chhan hriat lohin vawk 721 a thi tawh a; Khawzawl district chu infected area ni loa chhan hriat loha vawk thi awmna khua/veng tamna ber niin, khua.veng 18-ah vawk 162 a thi tawh.
Infected area ni loa vawk thi tamna ber chu Aizawl district a ni a, khua/veng 16-ah chhan hriat lohin vawk 212 a thi tawh a ni.
AH&Vety chuan chhan hriat loha vawk leh sanghal thi a awm chuan phone number 8731975444 leh 8974027269-ah hriattir zel turin mipui a ngen.
