Endik rûnpuia thawk turte zirtir

Aizawl khawpuia inkharkhip (total lockdown) kalpui chhungin swab sample endik rûnpui (mass testing) kalpui tura thawktu lâk tharte tan Pathianni khan Health Services conference hall-ah training buatsaih a ni.

Mass testing atan hian swab sample latu tur laboratory technician leh report buatsaihtu tur data entry operator mi 50 vel sorkar leh Aizawl City Local Council Association ṭangkawpin a ruahman a ni.

An puala nimina training hi Covid-19 state nodal officer Dr Pachuau Lalmalsawma‘n a kaihruai a; entomologist Lalfakzuala Pautu leh epidemiologist Dr Lalrintluanga leh, microbiologist Yogesh Malvi leh thawktu dangte‘n thil pawimawhte an zirtir a ni.