MBOCWWB hamṭhatna puan tawh tihfel ran an duh

Labour Beneficieries Association, Mizoram (LBAM) chuan thuchhuah siamin, Mizoram Building & Other Construction Workers Welfare Board (MBOCWWB)-a inziak lutte hnena hamṭhatna pek turah, thil mumal tawk lo leh kal muang ṭhin chu tifel rang ṭhin turin sorkar an ngen.

LBAM chuan, Labour, Employment, Skill Development & Entrepreneurship minister Lalchhandama Ralte-in MBOCWWB-a inziak lut, Covid-19 vei mi panga ṭanpuina pek a nih tawh thu te, hripui veite chu CCC-ah ni khat an awmin Rs. 1,000 zel pek an nih dawn thu leh, Rs. 10,000 pek tel an nih tur thu a sawi chu ṭha an tih thu an tarlang a; hemi rual hian ngai pawimawh tel tura an duhte an tarlang bawk.

LBAM-in ngaih pawimawh an duhte
. Member fate sikul kalna senso CEA (scho) kum 2020-a dil tawh, sanction vek ni si, bank account-a thun mumal lo lutuk hi a rang lama thun ni se.

. Member damlo, medical benefit diltute pawisa tur sanction a nih hnu pawha pek an ni har ṭhin lutuk leh dawng kim lo tam lutuk hi a rang lama pek ni rawh se.

. Death benefit leh funeral assistance sanction sa pawisa an dawng har ṭhin lutuk hi a rang lama pek ni rawh se.

. Pension dilte pawisa dawng mumal lo lutuk hi enfel ni rawh se.

. Kolasib leh Mamit district-a member ID renew kum khat zet chhuak tawh lo hi a rang lama tihchhuah ni se, department-in an kawlsak chhunga benefit hrang hrang dil tur neite dil phalsak ni rawh se.

. New registration July 2020 hnu lama thehluh tun thlenga la khawih loh hi a rang lama tihchhuah ni se, CEA an dil phalsak ni rawh se.