KHAWTHLIR

Chief minister Zo­ram­thanga chuan nimin khan a pisaah Agriculture minister C Lalrinsanga, Agriculture leh Horticulture department officer-te a kâwm a; Covid-19 hripui léng kara kut hnathawktute harsatna sukiang tur leh buh leh thlaia ram a intodelh­na tura hmalaknate a sawipui. Intodelh tura department-te'n rua­hmanna an lo siam tawhte thlirho a ni a, project tangkhang hrang hrang leh sum din­hmunte an sawiho bawk.

GAD chuan, Core Group for Citizen’s Charter turte a ruat. Convener tur chu R Lalṭhazuala, GAD joint secretary a ni a, secretary tur chu deputy secretary Margaret Lalrinawmi Fanai a ni. Member atan under secretary Rochuangkimi Khenglawt, superintendent Jennifer VL Hmingliani leh assistant Ian Laldinliana te ruat an ni bawk.

Aizawl District Magistrate chuan, inkhàrkhip thawh nganaa zan lama curfew hun chhung - zan dar 7:30 - zing dar 4:30 inkarah phalna la loa páwna chhuak thei zingah kohhran hruaitu, kohhran thil pawimawha kohhran lirtheia chhuak­te telh a nih thu a tarlang.

Indian Council of Medical Research (ICMR) leh Zoram Medical College (ZMC) hotute chuan nimin khan video confe­rence an nei a, ZMC-a Virus Research and Diagnostic Laboratory (VRDL) din chungchang an sawiho. VDRL nei tur hian AMC Microbiology department leh ICMR-in hma an la mek a, VDRL din a nih chuan Mizoram­a virus vanga natna chi hrang hrang endik theih a ni dawn tih SRH-ZMC bulletin chuan a tarlang.

Naktuk aṭanga June thla chhung zawng SM Interior Private Ltd.-te'n Hortoki leh Kawnpui inkar kawngpui an siam dawn avangin Inrinni leh Pathianni apiangin he kawng hi khâr tur a nih thu Kolasib SP chuan a puang. Harsatna tâwk emaw, sawi tur nei emawte chuan Kawnpui Police Stateion-a oficer in-charge phone number 9863940688 / 7085130815 leh Kolasib PS phone 03837-222281-te biak theih a ni.