Covid-19 vei symptom nei lote Test nawn loin chhuahtir dawn; Mithiamte'n him tâwkah an ngai - Health Minister

Covid-19 vei, natna lang lo leh natna lang nasa lo (mild/moderate symptom)-te chu swab sample endik nawn loin ni 10 hnuah chhuahtir ṭan an ni a, nizan khan kalpui ṭan a ni. Hemi chungchang hi nimin khan Health minister Dr R Lalthangliana chuan Secretariat conference hall-ah thuthar thehdarhtute a hrilhfiah a, "Khawvel mithiamte'n him tâwkah an ngai," a ti.

Dr R Lalthangliana chuan, hripuiin kum khat leh a chanve vel Mizoram a chàmchilh tawh tih sawiin, "Covid-19 chungchangah Mizoram kan fimkhur em em a, kan duhtui hle. State dangte pawhin an tih tawh loh angin contact tracing leh Covid-19 veite chhuahtir dan pawh kan kalpui. World Health Organisation (WHO), USA leh South Korea-a Central for Disease Control (CDC) leh Indian Council for Medical Research (ICMR) pawhin ṭul an tih tawh loh thleng thlengin kan kalpui a ni," a ti.

Mizorama damdawi lam thiamte'n Covid-19 veite chhuahtir dan chungchang chu ngun taka an ngaihtuah thu sawiin Minister chuan, "Zau zawkin MKHC, Joint NGO leh local council hruaitute nen ngaihtuahho leh a ni. Tunah chuan exit protocol thar kan ti chhuak thei ta a ni," a ti a; ruahmanna thar (Revised Discharged Protocol for Covid Patient)-ah chuan Covid-19 veite ṭul loa hun rei tak chhung inhrèn ṭhin tihtawp a ni dawn niin a sawi.

Covid-19 Medical Operational Team chairman Dr ZR Thiamsanga, MLA chuan, inchhuahtir dan thar chu sorkarin a duhthua a tih mai a ni lo tih sawiin, "Mithiamte nen vawi hnih/thum ṭhutkhawm a ni a, extended meeting-te neih a ni. Exit test (chhuak tur test nawn) hi hmun dangah chuan an ti ngai tawh lo. Quarantine test-ah pawh ni 7-10 nghak kher loin, symptom an neih chuan test zung zung tawh ni se tih a ni a, hri vei chu hriat chhuah vata dah hran vat a ṭha," a ti.

Revised Discharged Protocol for Covid Patient thar sawifiahtu Dr J Lalramchhuanga chuan, Covid-19 chu natna thar a nih avangin zir chian zel a nih thu sawiin, "Enkawl dan leh chhuah danah zirchianna aṭangin ruahmanna thar siam a ni. Covid-19 veite chhuahtir dan hi WHO chuan January 12, 2020-ah a duang a, thil thar a nih avangin a anpui deuh SARS zûlzuiin an duang," a ti a, discharged protocol chu WHO-in May 27, 2020-ah a duan thar leh thu a sawi.

Dr J Lalramchhuanga chuan, mithiamten an zirchianna aṭangin Covid-19 vei symptom nei lo leh nei nasa lote'n ni 10 hnuah mi dang an kai chhâwng thei tawh lo tih an finfiah nia sawiin, "Hei hi WHO, USA leh South Korea CDC leh ICMR ngaihdan a ni," a ti.