Total lockdown-in zawm a hlawh

Mizoram sorkarin Covid-19 vei an pun zel avanga July 18 aṭanga Aizawla total lockdown a puan chuan zawm a hlawh ṭha a, khawlaiah mihring leh lirthei veivâk hmuh tur a tam lo.

Mizoram sorkar ngenna angin veng hrang hrang local task force-te chuan an huam chhunga inkalpawhna hmun hrang hrangah hrui pawtin duty an indah a; veng ṭhenkhatah chuan veivâkte'n phalna an neih leh neih loh uluk taka an endik laiin, veng ṭhenkhatah erawh chuan duty indah mah se, phalna nei leh nei lo an endik lo thung.

Aizawl tlangdung kawngpui (Kulikawn-Bawngkawn) inkarah chuan duty awm mah se, hrui pawh a ni lo a; Vanglaini palai zawhna chhangin main road-a duty-te chuan, phalna nei loa chhuakvâk an awm meuh lo thu an sawi a, "Tlem azawng an awm ve a, chu'ng mite chu phalna la leh phawt turin kan hriattir ṭhin," an ti.

Hetih lai hian, kawng pènhlelh deuhah chuan phalna nei loa veivâk an awm nual a, chu'ng mite chu ṭhenkhat chuan an hawtir leh a, ṭhenkhat erawh chuan dan angin pawisa an chawitir thung.