NE state 3-a Covid-19 a darh nasat chungchang Court-in a ngaihtuah

Gauhati High Court chuan Covid-19 hripui léng thawh hnihnaah Mizoram, Arunachal Pradesh leh Nagaland-ah Covid-19 vei hmuh chhuah zat (positivity rate) a sàn em avangin state pathuma advocate general-te chu an state ṭheuha Covid-19 dinhmun leh state sorkarin hma a lak dante High Court-a thehlut turin a hriattir.

Hmarchhak state pathuma Covid-19 vei hmuh chhuah tam chungchangah hian PIL thehluttu an awm lo a, High Court Chief Justice Sudhanshu Dhulia leh judge pahnih Justice N Kotiswar Singh leh Manash Ranjan Pathak te chuan suo moto PIL hmangin July 19, Thawhṭanni khan a ngaihtuah a ni.

High Court thuchhuak (order) chuan, "Covid-19 second wave-ah Nagaland, Mizoram leh Arunachal Pradesh-ahte Covid-19 hripui nasa taka a darh avangin suo moto hmangin hriattirna kan chhuah a ni," a ti.

High Court chuan state pathuma advocate general-te chu court hearing leh hunah tel turin a ti a; state pathuma hripui leng dinhmun dik tak leh state sorkarin hripui donaa hma a lak dante hriat a nih theih nan Court-in an puihna a mamawh thu a tarlang.

Gauhati High Court hian July 23, 2021-ah hearing a nei leh dawn a ni.