Sample endik rûnpui kalpui a ni : Hripui vei mi 111 hmuh chhuah a ni

Mizoram sorkar chuan nimin khan Aizawl khawpuia veng panga leh Tuirialah swab sample endik rûnpui (mass test) an buatsaih a, hriat theih chinah mi 4,072-te sample endik aṭangin Covid-19 vei mi 111 hmuh chhuah a ni a, hripui vei hmuh chhuah hi 2.73% a ni.

Sample endik rûnpui hi Covid-19 hluarna deuh vengah buatsaih a ni a; Aizawlah chuan - Armed Veng South, Bethlehem Vengthlang, Chhinga Veng, Electric Veng leh Saron Vengah buatsaih a ni. Heng vengahte hian IDSP-in endik rûnpui an kalpui a; Tuirialah chuan Covid-19 Medical Operational Team (MOT)-te'n an kalpui thung.

MOT chairman Dr ZR Thiamsanga, MLA chuan, endik rûnpui neih zel a ni dawn tih sawiin, "A tamna hmun apiang hun rei lo têah tuam zawh kan tum. Inhmuh chhuah zung zung a, inenkawl vat vat kan duh. Lockdown hi ṭangkai taka hman kan tum," a ti.

Dr ZR Thiamsanga chuan, district dangah pawh endik rûnpui tih zel tum a nih thu sawiin, "A hluarna ber Aizawl lamah theihtawp kan han chhuah ang a, district dangah pawh tih zel tum a ni," a ti a; medical lam chu theihtawpa an ṭan tur thu a sawi.