Minister'n ten sample endikna an tlawh

Health minister Dr R Lalthangliana leh IPR minister Lalruatkima te chuan nimin khan Aizawl khawpui leh a chhehvela swab sample endik rûnpui (mass testing) neihna hmunte an tlawh kual a; ni khat chhunga endik kim hman lohte chu endik chhunzawm zel tur a nih thu an sawi.

Minister-te hian Tuirial, Bethlehem Vengthlang, Armed Veng South, Chhinga Veng, Saron Veng leh Electric Vengte an tlawh a; Dr R Lalthangliana chuan, total lockdown chu awmze nei taka kalpui a nih theih nan páwna mipui an chhuah tlem laiin a tam thei ang ber sample endik tum a nih thu sawiin, "Positive-te hmuh chhuah zung zung leh inkai chhâwnna chhu chat tura lâk hran zung zung kan tum. Sample test hi fimkhur tak leh uluk taka kalpui a ngai a, ni khata test kim hman loh pawhin chhunzawm zel tur a ni," a ti.

Lalruatkima chuan, swab sample endik rûnpui chuan hma lam hun atan rah ṭha a chhuah ngei a beisei thu a sawi a; task force, YMA leh kohhrante ṭanrualna fakawm a tih thu a sawi bawk.

Tuirialah hian sample endikna hmun pakhat awmin, CCCC pahnih an nei mek a; sample test zingah positive an tam chuan a dang pakhat an siam leh thei tura ngaih a ni.

Chhinga Vengah sample endikna hmun pahnih an siam a, hripui veite enkawlna tur CCCC pakhat an ruahman a ni. Electric Vengah sample endikna hmun pali-ah siam a ni a, CCCC pakhat an nei mek. A ṭula hman turin CCCC dang pakhat an ruahman thu an sawi.

Armed Veng South leh Bethlehem Vengthlangah sample endikna hmun pahnih ve ve leh Saron Vengah hmun pathumah an siam a; heng veng pathumte hian hripui vei hmuh chhuahte enkawlna tur hmunah harsatna an tawh theih thu an sawi. Minister-te hian theihtawp chhuahin sorkarin ruahmanna a siam zel tur thu an hrilh a ni.