KHAWTHLIR

Term exam thulh
Kumin July 20 aṭanga August 4 thlenga primary school, middle school, high school leh higher secondary school-te tan first term exam neih tura ruahman tawh chu ṭhulh (cancel) a ni. Hemi chungchangah hian School Education Director-in July 19, 2021 khan thupek a tichhuak a; exam ṭhulh chhan hi Covid-19 hripui léng a darh zau zel vang a ni.

Damdawi-in khâr
Mamit District Hospital-a doctor pakhatin Covid-19 a vei tih hmuhchhuah a nih avangin damdawi-in hi nimin aṭang khan khâr a ni a, vawiin leh naktukah pawh khâr a ni dawn. Rikrum thil leh hmanhmawhthlak bik thilah erawh pan theih a ni a; damlo na zualte tih loh chu in lama awm turin an ngen a ni.

Duhsakna hlân
Mizoram University chuan, kumin July 23, Zirtawpnia ṭan tur Tokyo Olympic Games-a India aiawha tel turte duhsakna sang ber an hlan thu an tarlang a, "MZU sports ambassador Lalremsiami Hmar, India women’s hockey team-a an player pawimawh berte zinga mi pawh duhsakna sang ber kan hlan a ni," an ti. Lalremsiami hi July 2019 khan MZU Vice Chancellor-in MZU Sports Ambassador for Women atan a lawm lut tawh a ni.

Earthmovers inhuam
Mizoram Earthmovers Owners Union chuan thuchhuah siamin, ramria buaina kaihhnawihah a ṭul angin an khawl (JCB leh Hitachi)-te thawh chhuahpui an inhuam thu an tarlang a, "Kan ram leh hnam chhan nan a ṭul dan azirin kan khawlte chêt chhuahpui a, sorkar thâ tichak chung zela hmalak kan inhuam a ni," an ti.

CM Relief Fund
Chief Minister's Relief Fund for Covid-19 ah nimin thleng khan Rs. 29,19,22,678 a lut tawh a, Covid-19 kaihhnawiha chhawmdawlna leh damdawi bungrua leina atan Rs. 25,31,14,470 hman tawh niin, la hman loh Rs. 3,88,08,208 a awm.