Hripui vei 807 hmuh belh a ni : Hmuh chhuah tam ber ní a thleng

July 19, Thawhṭanni khan Mizoramah Covid-19 vei mi 807 hmuh chhuah a ni a, ni khata hmuh tam ber ní a ni. Nimin khan hripui laka fihlim tawh mi 117 chhuahtir an ni a, hripui vangin mi pahnih an thi thung.

Covid-19 vei hmuh tharte chu mipa 398 leh hmeichhia 409 an ni a, ZMC laboratory-a hmuh chhuah 234, TrueNAT hmanga hmuh 63 leh RAT hmanga hmuh mi 510 an ni. A pumpuiah hmuh chhuah tam ber ni a nih bakah, ZMC leh TrueNAT hmanga hmuh tam ber ní a ni.

July thla ni 19 chhungin hripui vei mi 7,803 hmuh chhuah a ni tawh a, chawhrualin ni tin mi 410 chuang (410.68) hmuh chhuah an awm ziah ang a ni. Nimin zinga positive result a chhuah hnuah enkawl lai (active case) 6,482 an awm a, a tam lai ber a ni.

IDSP record angin, Mizoramah Covid-19 vei mi 28,295 hmuh chhuah a ni tawh a, mipa 15,571 leh hmeichhia 12,724 an ni. Nimin tlai dar 5 thleng khan mi 21,805 (77.06%) chhuahtir an ni tawh a, mi 125 (0.44%) thi tawhin, enkawl mek mi 6,365 (22.50%) an awm.

July 19, Thawhṭannia swab sample endik dan chu - ZMC-ah 2,755, TrueNAT hmangin district 11-ah 447 leh RAT hmangin district 11-ah 4,234 a ni a, a vaiin sample 7,436 (mipa 3,939 hmeichhia 3,497) niin, chuta ṭanga hripui vei hmuh chhuah 807 chu 10.85% a tling. Positive percentage hi ZMC-ah 8.49%, TrueNAT-ah 14.09% leh RAT-ah 12.04% a ni a; mipaah 10.10% leh 11.70% a ni.

Thawhṭannia district-a Covid-19 positive hmuh dan chu - Aizawl district-ah mi 550, Lungleiah 103, Kolasib-ah 56, Lawngtlaiah 27, Mamitah 23, Siaha leh Champhai 20 ve ve, Serchhipah panga, Hnahthialah pahnih leh Saitualah pakhat a ni a; Aizawla veng 57 leh khua/hmun dang 50-a mite an ni. Hripui vei hmuh thar mi 807-te chu natna lang chhuak 443 leh lang lo 364 an ni a; tualchhunga kái 794 leh tun hnaia state páwn aṭanga rawn lut mi 13-te niin, tualchhunga kái zingah kàina chin hriat loh mi 255 an awm.

ZMC laboratory-a hmuh chhuahte mi 234 zingah symptom nei 16 an awm a; tualchhunga kai 230 leh state pawn aṭanga lut mi pakhat niin, tualchhunga kái zinga pakua chu kàina chin hriat loh an ni. TrueNAT hmanga hmuh mi 63 zingah symptom nei 20 an awm a; tualchhung kai 57 leh state páwn aṭanga lut paruk niin, tualchhunga kái zinga pathum chu kàina hriat loh an ni. RAT hmanga hmuh mi 510 zinga 407 chu symptom nei an ni a; tualchhunga kái 507 leh state páwn aṭanga lut pathum niin, kàina hriat loh 252 an awm.

Mi 807 zingah naupang kum tling lo 230 vel telin, an zinga 100 velin symptom an nei a; nausén kum khat tling lo pakua an awm. Kum 60 chung lam mi 60 vel an awm a, a zatve velin symptom an nei a, a upa ber chu kum 87 mi an ni. Nimin khan tlai dar 5 thlengin hripui laka fihlim tawh mi 117 chhuahtir an ni a; Kolasib district-ah mi 48, Lawngtlai district-ah 20, Mamit district-ah 19, Aizawl district-ah 13, Saitual district-ah paruk, Lunglei district-ah panga, Khawzawl district-ah pathum, Champhai district-ah pahnih leh Serchhip district-ah mi pakhat an chhuak.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a; ZMC-ah positive 8,124 hmuh chhuah a ni tawh a, TrueNAT-PCR hmangin 1,793, RAT hmangin 18,377 leh Guwahati-ah pakhat hmuh chhuah a ni tawh. IDSP tarlan danin, July 19, 2021 thlengin Mizoramah swab sample 5,64,674 endik a ni tawh a, chu'ng aṭanga Covid-19 positive hmuh tawh zat 28,295 chu 5.01% a ni. Hripui vei hmuh tawh zinga mi 21,145 chu Mizoram chhunga kái chhâwng an ni a, mi 4,150 chu Mizoram páwn aṭanga an rawn luh hnua hmuh chhuah an ni.