Covid-19 vangin mi 2 thih belh

Nimin khan Covid-19 vangin mi pahnih an thi a; sorkar chhinchhiah angin, Mizorama Covid-19 vanga thi chu mi 125 an tling tawh.

Covid-19 vei State Re-ferral Hospital-a enkawl lai C Vanlalbera (42) s/o C Lalirha, Saikao (Serkawr), Siaha district chu nizan zanlai pelh hnu, zing dar 1 khan a thi a, nimin khan an khuaah vui a ni. Covid-19 positive a ni tih June 14, 2021-ah hmuh chhuah a ni a, June 25-ah SRH-ah enkawl ṭan a ni tih sorkar thuchhuakin a tarlang.

C Vanlalbera hi missionary a ni a, Covid-19 a vei hmain sinus a nei tih loh chu natna dang a nei lo nia thu dawn a ni.

Nimin zing dar 6:30 khan K Rochhunga (84) h/o Lalmawii, Bethlehem Vengthlang chu hripui vangin SRH-ah a thi a, nimin chawhma dar 11 khan YMA Hall-ah vui a ni. K Rochhunga hi Covid-19 positive a ni tih July 11, 2021-ah hmuh chhuah a ni a, July 13 aṭangin SRH-ah enkawl a ni.