Vegetable Supply Chain kalpui dawn

Aizawl Municipal Corporation (AMC) huam chhungah total lockdown puan a nih avangin nimin khan Agriculture secretary J Hmingthanmawia hoin Vegetable Supply Chain kalpui dan tur an rél a, ruahmanna an siam nghal.

Ṭhutkhawmah hian Vegetable Supply Chain turin zonal officer an inruat a, a tam tham deuha thlai thar - tomato, zîkhlûm, bawkbawn, chawngthei (dragon fruit), lakhuihthei leh balhlate chu Directorate of Horticulture building-ah lak khawm a, AMC huam chhunga mamawhna vengahte LTF kaltlangin pek chhuah leh ṭhin turin an rêl.

Mizorama thlai thar chungchangah chuan, a mamawhtu LTF-te leh thar chhuahna khuaa loneitute emaw village task force emaw aiawhte zonal officer-te kaihhruaina hnuaiah indawr ṭhin tura ruahmanna siam a ni a; sa erawh chu AH&Vety department kutah leh sangha chu Fisheries department kutah dah a ni.

Ṭhutkhawmah hian Horticulture director Elizabeth Saipari, MIZOFED chairman Laldawngliana, Commerce & Industries additional director HD Lalrintluanga, Aizawl City Local Council Association aiawh leh official dangte an tel a ni.