International online workshop buatsaih

InSPA, Mizoram leh School Education department chuan nimin khan Mizorama secondary school zirtirtute tan ni hnih awh tur 'International online workshop on issues in school psychology' an buatsaih ṭan a, InSPA patron Dr Lalzirmawia Chhangte, Education secretary-in a hmanpui.

Dr Lalzirmawia Chhangte chuan, ṭhalaite khawvelah psychology a pawimawh thu sawiin, "Hripui lên laia online international workshop buatsaih a ni hi psychology hriatna lamah hmasawnna thlentirtu a nih ngei ka beisei," a ti.

School Education director James Lalrinchhana chuan, InSPA nen ṭang dunin workshop ṭum li an buatsaihna a nih thu a sawi a, "Education department hnathawh ṭhat avangin School Education chuan 'InSPA Educational Excellence Award, 2020' a dawng a, state convener Dr Rinpari Ralte pawhin 'PA Sharma Best School Psychology Trainer Award, 2020 a dawng tawh a ni," a ti.

Workshop-ah hian district 11-a secondary school eng emaw zat aṭangin zirtirtu pahnih - mipa leh hmeichhia pakhat ve ve zel telin, zirtirtu 1,057 an tel a; Puducherry University, University of Dhaka, Madras University, Mizoram University, University of Malaysia leh Assumption University, Bangkok-a mithiamte'n thu an sawi a ni.