Ramri buaiah ṭanrual a ngai - MPCC

Mizoram Pradesh Congress Committee (MPCC) chuan, tun hnaiah Assam-in nasa takin ramri-ah Mizoram a nék a, tun hma zawng aiin a zuam nia a lan thu an sawi a; ramria buainaah mipui ṭanrual a ngaih thu leh sorkar thâ ti chak tura theihtawp chhuah a ngaih thu an tarlang.

MPCC thuchhuah chuan, ramri buai chu awlsam taka chinfel theih a ni lo tih sawiin, "State pahnih lungrualna a ngaih avang leh state pahnih ngaihdan a inan theih si loh avangin thil buaithlak tak a ni," a ti a; hun kal tawhah Congress sorkar lai, MNF sorkar lai leh PC sorkar laite pawhin ramri vanga buaina a thleng fo tawh tih sawiin, "CM level-a inbiakna te, CS level-a inbiaknate a lo awm tawh ṭhin a, mahse, ramri chin nia kan hriat a inan loh miau avangin buaina chinfel mai theih a la ni lo," a ti.

Hun kal tawhah Assam-in Mizote luah chin ram an rawn nék fo tih sawiin MPCC chuan, "Mizoram hi a tawlh ngai lo a, mi náwlpui hriat lêm lohin kan luah chin ram kan zauh hret hret zawk ṭhin. Tun hnua Assam-in Mizote huan thlai an rawn tihchhiatte hi sorkar hmasa lam aṭang tawha Mizote luah chin ram vek a ni," an ti a; tunah chuan Assam-in tun hma zawng aiin Mizoram an zuam a, Mizoram chin a luah belh tial tiala a lan thu an sawi.

Congress party chuan, "Mizote luah chin, huan thlai kan neihna ram ngei eng emaw zat hun rei lo te chhunga Assam lamin min chhuhsak ta mai hi hriatthiam harsa kan ti a. Tun hnaia Assam laka kan hloh tâkte hi lâk lêt leh an nih theih nan Mizoram sorkar hian na takin hma la se la, Mizoram police-te pawh nasa takin thuam ṭha rawh se," an ti a; ramri humhalhna kawnga sorkar thâ tichak turin pawl leh mi tin an sáwm a ni.