International Conference on NE Tourism

Tezpur University leh Finderbridge Tourism chuan nimin khan video conference kaltlangin 'International Conference on North East India Tourism' an buatsaih a, Tourism minister Robert Romawia Royte-in a hmanpui.

Robert Romawia Royte chuan, India hmarchhak bialah tourism-in hmabak êng tak a neih thu sawiin, "Hmarchhak state hrang hrangte thawkho a, hripui kiam hnuah khualzin tam zawk hîp a ṭul. Look/Act East Policy avangin ASEAN leh Indo-Pacific ram hrang hrang aṭanga khualzinte tan pawh tlawh manhla tak tur a ni," a ti a; cross border cultural tourism nasa zawka kalpui a hun thu leh tourism hmasawnna turin information hrang hrang inhrilh tawn zel a pawimawh thu a sawi.

Mizoram chu Covid-19 hripui a zawh hunah khualzinte tlawh châk ber tur a nih thu sawiin Robert Romawia chuan, "Mizoram chu hmun rálmuang, hmun reh raih mai leh khualzin tam zawkte'n an tlawh pawh loh a nih avangin hripui a zawh hunah khualzinte tlawh chak ber tur a ni a, chumi atan chuan Mizoram sorkarin ruahmanna hrang hrang a siam a ni," a ti a; Mizoramah tourism sector chu ṭhalaite tan eizawnna tlaka siam a ṭul thu te, chumi atan chuan destination based skill development training buatsaih a nih ṭhin thu leh tun hnaiah tour guide 83 chher chhuah a nih tawh thute a sawi bawk.

Minister hi Tourism secretary K Lalrinzuali, director V Lalengmawia leh tourism service provider-te'n an ṭawiawm a ni.