State/UT 10 ODF-ah puan a ni tawh : Mizoramah district 4 ODF-ah puang tawh

Swachh Bharat Mission (Gramin) hnuaia páwn lama inthiar awm lohna, open defecartion free (ODF)-a India ram siam tumnaah state pasarih leh union territory pathum ODF-ah puan a ni tawh a; Mizoram erawh ODF-ah puan theih a la ni lo a, district pali ODF-ah puan tawh niin, district pali puan a la ni lo.

Swachh Bharat Mission (Gramin) hnuaia ODF hmalakna hi Ministry of Drinking Water & Sanitation-in an kalpui a ni a, Mizoramah chuan thingtlang bikah PHE department-in an kalpui a, khawpuiah chuan Urban Development & Poverty Alleviation (UDPA) department-in an buaipui a ni.

ODF-a puan chungchangah hian, PHE department-in an buaipui thingtlangah chuan state sorkar hnuaia committee-in endik leh ODF-a puan an ti thei a; UDPA-in an buaipui khawpuiah erawh chuan Quality council of India hnuaia third party verification team-in an enfiah phawt a ngai thung.

Thu dawn danin, PHE department-in an enkawl thingtlang leh district-ah chuan district pali - Aizawl, Champhai, Kolasib leh Serchhip district-te chu district pumpui ODF-ah puan a ni tawh a; ODF-a la puan loh - Mamit, Lunglei, Lawngtlai leh Siaha district-te pawh ODF-a puan a nih theih nan chak taka hmalak mek niin, tun sorkar kum kal mek chhungin puan hman tum a ni.

Mizoramah khawpui (census notified town) 23 a awm a, chu'ng khawpuite ODF-a puan a nih theih nana hmalakna chu UDPA department-in an enkawl a ni. Notified town 23 zingah Thenzawl, North Vanlaiphai, Siaha leh Kawnpui-te ODF-ah puan a la ni lo a, khawpui dang 19 chu ODF-ah puan a ni tawh.

UDPA secretary Dr C Vanlalramsanga chuan, Thenzawl leh North Vanlaiphai chu vantlang hmun (commercial area)-ah vantlang inthiarna a awm loh vanga ODF-a la puan theih loh a nih thu Vanglaini a hrilh a, "Ministry lamin mipa leh hmeichhia toilet hran leh water supply ṭha an phût a ni," a ti.

Dr C Vanlalramsanga chuan, Siaha leh Kawnpui khuate ODF-a puan a la nih loh chhan chu documentation kim loh vang a nih thu a sawi a, "Document an neih kimna turin hmalak mek a ni," a ti. ODF-a la puan loh khawpui palite chu puan thuai theih beisei a nih thu a sawi.

Ministry of Drinking Water & Sanitation tarlan danin, India ram pumah thingtlang khua 3,00,000 chuang, district 300 chuang, UT pathum leh state pasarihte ODF-ah puan a ni tawh a; Swachh Bharat hnuaiah India ramah inthiarna nuai 600 chuang siam a ni tawh.

India rama state pumpui ODF-a puan tawhte chu - Sikkim, Himachal Pradesh, Kerala, Haryana, Uttarakhand, Gujarat leh Arunachal Pradesh-te a ni a; ODF-a puan tawh UT-te chu Chhattisgarh, Chandigarh leh Daman & Diu-te a ni.

Ministry of Drinking Water and Sani­tation-a secretary Parameswaran Iyer chuan, March 2018 chhungin state leh UT dang 15 chu ODF-a puan theih beisei a nih thu leh, October 2019-ah India ram pumpui ODF-a puan theih beisei a nih thu a sawi.