Ramrî-ah Assam-in khelmual tur a lâi

Assam sorkar chuan Lailapur leh Vairengte inkara state ramrî (boundary)-ah khelmual tur nia sawi an lai mek. Khelmual tur laihna hmun hi ramri chinfel loh lai nia sawi a ni.

Thu dawn danin, September 3, 2015 khan Kolasib DC leh Cachar DC-te chu Vairengtea Counter Insurgency and Jungle Warfare School (CIJWS) conference hall-ah an ṭhukhawm a; state pahnihte'n ramrî-ah hmalakna an neih dawn rêng rêngin mahnia hmalakna kalpui mai lo a, inhriattir tawna tih ṭhin ni se, tiin thu an dah.

CIJWS-a meeting-ah hian Kolasib district aṭangin DC Jitender Yadav leh SP C Lalzahngoa bakah sorkar hotu dangte an tel a; Cachar district aṭangin DC S Vishwanathan leh SP Rajveer Singh bakah, Forest department hotute leh hotu dangte an tel. Hemi ṭum hian Vairengte auto-rickshaw stand thlanga bawlhhlawh paihna chungchangah hmalak dan tur an ngaihtuahho nghal a ni.

Hetih lai hian, Assam sorkarin khelmual tur a laihna kawngpui râl leh lamah Forest Teak Plantation hmunah chhungkaw panga an cheng mek bawk a; chu'ng chhungkaw pangate chuan an chenna hmunah chuan kum li vel an chen tawh thu an sawi. An in bangah December 2017-a Assam sorkara Health department-in an fate zeng danna an pek chhinchhiahna ziah a ni bawk.