J Thankima College campus-a mimal in zirlaite'n ṭhiah an tum

J Thankima College zirlaite chuan an college campus chhunga mimal in sak nia an hriat, B Lalhmangaihi, Chal­tlang Dingdi Veng in chu February 3, Inrinni khan ṭhiah an tum a, police an inrawlh hnuah buaina lian chhuak loin an ṭîn darh.

Zirlaite'n B Lalhma­ngaihi in ṭhiah an tum avang hian police eng emaw zatin an veng a; zirlaite chuan in kawta hulhliap zâr, eirawng­bawlna atana hman chu an tihchhiatsak hman bakah, tuizem pahnih pawh an lumsak a, bang ṭhenkhat an pawt kau hman bawk. Mahse, police ṭhahnem takin an dan avangin zirlaite chuan in chu an ṭhiat thei lo a ni.

J Thankima College zirlaite chuan reso­lu­tion siamin, B Lal­hma­ngaihi in luah mektu, R Lalhmingliana te chhungkua chu an college ram aṭang a rang taka chhuak turin an phût tih an tarlang a; sorkarin an college tana ram a pek chhunga dan loa chhungkua awmte chu February 18, 2018 hmaa chhuahtir turin sorkar an phût bawk. An hun tiam chhunga an chhuak lo a nih chuan a tawp thlenga an nawr tur thu an tarlang.

Thu dawn danin, B Lalhmangaihi hian in a sakna hmunah hian kum 1970 leh 1973-ah land lease a nei a, a ram huam tel hian Mizoram sorkar chuan kum 2013 khan J Thankima College hmun tur a pe a, land lease pawh kum 2013 vêk khan a pe chhuak a ni.

Aizawl Additional District Magistrate chuan October 3, 2017 khan J Thankima College cam­pus chhunga ram nei anga insawi B Lalhmangaihi chu dan loa in sa a nih thu hriattirin, chhuak turin thu a pe a; Court thupek hi B Lalhmangaihi chuan Court-ah a khing let ve thung a, thubuai hi Court-ah a inchiah mek a ni.