Inkhung zo tawhte RTPCR-a endik phût

Mizoram Pradesh Youth Congress Committee (MPYCC) chuan nimin khan thuchhuah siamin, state páwn aṭanga rawn haw, inkhung hran (quarantine) hun hmang zo tawhte zawng zawng RT-PCR hmanga endik an phût thu leh Covid-19 do nan SEDP sum hman a hun hlea an hriat thu an tarlang.

Hemi rual hian MPYCC chuan, Co­vid-19 donaa hah taka hma latu Mizoram sorkar leh sorkar hnathawkte fakawm an tih thu an sawi a, "Chhum lo chat loa a hmatáwnga awm force, medical, task force, media, tlawmngai pawl, kohhran leh mimal inpete kan fak a, an inpekna ropui kan ti tak zet," an ti.

MPYCC chuan, May thlaa Tamil Nadu aṭangin Mizo ṭhahnem tak rawn haw, inkhung hran hun hmang zo tawh, mahni in lama fimkhur taka awm tura tih mekte chu a rang thei ang bera swab test ti vek turin sorkar an phût a; hetianga an phût avang hian mipui chîâi phahna tur a awm lo tih an sawi.

Health Minister-in June 2, 2020-a press conference a neihnaah, June 1, 2020 zana Covid-19 vei hmuh chhuah thar mi 12-te rapid antibody test (RAT) hmanga endiknaah an reactive (positive) anga an sawi chu press mite leh mipui hnena thu dik lo puanzarna a nih thu tarlangin, MPYCC chuan, "A nih angin a dik tak sawifiah leh rawh se," an ti.

MPYCC chuan, "Vanglaini newspaper-in chiang zawka an chhui hnuin Thingdawl quarantine facility-a positive mi 11 an hmuh tharte'n RAT an paltlang vek (non-reactive) a ni tih an tarlang. Sorkar berin RAT result dik lo pui, dik anga thu dik lo hmanga mipuia an puangzar hi thil hlauhawm leh dik lo hual hual a ni," an ti a, thu dik lo an puanzar avangin mipui hnena ngaihdam dil turin sorkar an phût a ni.

Congress ṭhalaite chuan, RAT chu Covid-19 atan a rintlak tak tak loh avangin phai aṭanga lo haw, inkhung hran hun hmang zo tawhte pawh RT-PCR hmanga endik leh vek an phût a; red zone chauh ni lo, state páwn aṭanga Mizorama lut zawng zawng RT-PCR hmanga endik vek an phût bawk. Heng atan hian sorkarin sum a harsa a ti a nih chuan, SEDP-a sum tam tak an dahte hman hun a nih thu an sawi.

Mizoram chu state pumah Covid-19 vei mi 711 enkawl thei dinhmunah a din thu sorkarin a sawi nia sawiin MPYCC chuan, "District hrang hranga Covid Care Centre-te hi hman tlakin thuam nghal ni rawh se, a hminga khum dah ringawt lo a, mipui thlamuanna tling siam turin sorkar kan phût. Zoram Medical College-ah khum 36 tan ventilator a awm a, ICU bikah khum pasarih chauh a awm." tih sawiin, ZMC pawh Covid-19 vei enkawl nan thuam ṭha lehzual turin an phût a ni.