KHAWTHLIR

Thisen pe
ITI Veng Bial KṬP chuan Inrinni khan blood donation camp an huaihawt a, Synod Hospital tan mipa 32 leh hmeichhia pathumin thisen unit 35 an pe. Mizoram Gorkha Youth Association sub-headquarters, Kolasib pawhin Kolasib District Hospital-ah thisen unit unit 36 an pe bawk.

KNP inkhawmpui
Evangelical Church of Maraland (ECM)-a nu ho pawl, Krizy No Py (KNP) General Conference chu February 1, Ningani zan khan Lungbun khuaah ṭan a ni a, nizan khan a ṭiak. Inkhawmpuiah hian palai 2,000 chuang an kal a; rorel palai 527-te'n president K Lawmi kaihhruaiin February 2 khan ro an rel a, kum 2018-19 budget atan Rs 22,00,000 an pawm.

Agri. Director
Agriculture (Research & Education) joint director ṭhin, RL Thanzuala chu tun hnai khan director-ah a kai sang a, director hna hi February 1, 2018 khan a thawk ṭan.

Jubilee lawm
Dawrpui Vengthar Presbyterian Kohhran chuan January 29, 2018 aṭang khan diamond jubilee an lawm. Jubilee hi kawng hrang hranga an lawm hnuah February 2 khan kohhran pumin ruai an ṭheh a ni.

Siaha MJA hruaitu
Siaha District MJA chuan tun hnai khan office bearer thar an thlang a, president atan V Pawhla, vice president atan M Baithai leh treasurer atan CZ Hluna te an thlang.

Eco-Club din
J Thankima College leh Mizoram Environmental Information System (ENVIS) Hub ṭangkawp chuan, February 1-2 chhung khân J Thankima College-ah Environment education: Issues and challenges' tih thupui hmangin workshop an buatsaih a, J Thankima College-a Environmental Studies 4th. semester zirlaite an tel. Workshop tihlawhtling tur leh bawhzui zêl turin Eco-Club an din nghal a ni.

Ramri enfiah
MJA, Kolasib district chuan, February 3, Inrinni hnai khan Mizoram leh Assam inrìna, Vairengte leh Lailapur inkar an tlawh a; Assam sorkarin ramria khelmual tur an laih mek an enfiah. Kolasib MJA-te chuan, Assam sorkarin state pahniha sorkar thuneitute'n buaina a chhuah lohna tura thu an dah chu an bawhchhe ngei nia an hriat thu an tarlang.