Nursing School-in harsatna an tâwk
Nursing School, Thingdawl chu December 2017 aṭang khan class ṭan ni tawh mah se, kawlphetha pek dan a la mumal loh bakah, tui lamah harsatna an tâwk mek.
Thu dawn danin, Thingdawla Nursing School hi October 2017 khan Indian Nursing Council chuan an enfiah a, General Nursing and Midwifery (GNM) zirna atan November 2017 khan recognition a pe. Recognition hmuh hnuah zirlai tur lak nghal a ni a, December 18 aṭangin class an ṭan a ni.
Nursing School-ah hian zirlai 20 an awm mek a, principal hoin thawktu mi panga an awm. Thawktute chu Nursing School-a thawk tur bika lak an ni lo a, Health department hnuaia programme hrang hranga B.Sc. (Nursing)-te pawh khâwm an ni.
Nursing School-a thawkte'n Kolasib-a thuthar thehdarhtute an hrilh danin, building an luah luh har avangin electric wiring a chhe nual tawh a, chu chu a siamṭhatna tur sum an la nei lo. Zirlaite class lakna tur lamah kawlphetha pek theih a nih loh avangin hostel room tura siamah class an kal ṭhin.
Nursing School atan hian tuizêm (tanky) siam a nih loh avangin tui lamah harsatna an tâwk mek. Tuizem (Sintex) litre 2,000 dawng pathum an nei a, PHE department leh Thingdawl V/C-te hmalaknain plastic pipe hmangin temporary connection pek mek an ni a, PHE department-in tui pek tam tum mah se, a dahna tur an nei ṭha lo a ni.
Nursing School atan hian sorkar laipui chuan July 27, 2017 khan fund office expense leh ṭul dangtea hman tur cheng nuai 49.42 leh major work atan cheng nuai 150.75 a pe chhuak tawh a; Hospital & Medical Education directorate chuan sum hi a la pe chhuak lo.