Aizawl enkawl zo loah MNF puh nawn

Congress party ṭhalai chuan thu­chhuah siamin, Aizawl Municipal Corporation (AMC)-a sorkarna chelh mek MNF party chu Aizawl khawpui enkawl zo loah an puh a, "Aizawl khaw­pui pawh enkawl zo lo MNF-te hi Mizoram pum enkawl tlak an ni lo," an ti.

MPYCC chuan, Aizawl khawpui chhung bawlhhlawh paih dan mumal loh chungchangah MNF ṭhalaite chu AMC-a MNF sorkar thup mawi tumah puhin, "Khawlaia bawlhhlawh chhêk vûm hnêr hnûr chu misual tute emaw thil tih anga an puh ringawt hi mak kan ti a, mipui nuih an tiza hlein kan hria," an ti a; Aizawl khawpui bawlhhlawh hmuh tur awm ṭhina mawhphurtu dik tak chu AMC-a MNF sorkar niin an sawi.

Congress ṭhalaite chuan, India rama state hrang hrang khawpuite hmasawn zawnga nasa taka an ṭhan lai a, Aizawlah chuan hmasawnna hna thawh tur tam tak thawh hleih theih a nih thu an tarlang a, "Mawh latu tur ber AMC-ah a ngaihna hre map lo MNF party-te'n an hruai rih tlat vang a ni," an ti.