Lunglei dist-ah mi 686 khung hrang mek

Lunglei bawrhsap V Lalsang­liana chuan nimin khan DC confe­rence hall-ah thuthar thehdarhtute a kâwm a, Covid-19 chungchanga Lunglei district-a hmalak dan a hrilhfiah. He hunah hian, Lunglei district-ah khung hran mek mi 686 an awm thu tarlan a ni.

Lunglei DC chuan, Covid-19 vanga inkhàrkhip tawh chinah Lunglei district hmalakna a ­tluan thu sawiin, "Ei leh bâr lak khawm leh semah te, dan leh thupek kenkawhahte leh task force-te duty-naahte harsatna a awm lo. Amaherawhchu, hmun hrang hrang aṭanga Lunglei district mi leh sa tangkhangte an rawn thlen belh mek zel avangin kan fimkhur sauh a pawimawh," a ti.

Lunglei district-a quarantine mek zingah Covid-19 vei hmuh chhuah a nih thu sawiin V Lalsangliana chuan, "Delhi aṭanga lo haw a ni a, June 1, 2020 zing kár khan Lunglei a lo thleng. Tunah chuan khawsik a nei lo a, mahse, hritlang leh khuh (mild case) a nei. A dinhmun hlauhthawnawm a ni lo," a ti a; Pukpuia Covid Care Centre-ah enkawl nghal a nih thu leh contact tracing tih nghal a nih thu a sawi.

DC chuan, Covid-19 kai khung hranna hmun Lunglei Ramthar BCM kohhran hall, community quarantine centre compound chu mipui tana tlawh pawh theih loh (containment area)-a siam nghal a nih thu a sawi a, "Mi tin kan fimkhur sauh a ṭul rualin, chîâi loh tur a ni a, kan him tlàn theihna tura sorkarin tih tur leh tih loh tur a tihte kan zawm a ngai," a ti.

Lunglei SP Stephen Lalrinawma pawhin thu sawiin, inkhàrkhip mekah Lunglei police-te'n theihtawp an chhuah thu a sawi a; police station tinah flying squad din a nih thu leh quarantine centre-te police-te'n uluk takin an vil thu a sawi bawk.

Lunglei chief medical officer Dr Thani Pachuau sawi danin, Lunglei district-ah khung hran mek mi 686 an awm a, chu'ngte chu home quarantine-a awm mi 77, sorkar quarantine centre-a awm 433 leh kohhran hall-a awm mi 176 an ni. Mi 457-te swab sample lak a ni tawh a, mi 82-te result hmuh tawh a ni.