Futsal-ah MJA team an champion

Assam Electronic Media Sports Journalist Association-in February 1-4, 2018 chhunga DTRP Indoor Stadium, Nehru Stadium, Guwahati-a 'Gilbertson Sangma and Debasish Rai Trophy - Himalayan States Media Futsal Tournament a buatsaihah Mizoram Journalist Association (MJA) team an champion.

Tournament-ah hian India hmarchhak state-te leh Himalaya tlangdung state-te aṭangin team an tel a; Mizoram aṭang bakah, Manipur, Meghalaya, Barak Valley (Assam), Uttarakhand, Sikkim, Himachal Pradesh, Nagaland, Meghalaya leh Arunachal Pradesh aṭangtein journalist team an tel.

MJA team hian group league-ah Arunachal Pradesh team 3-1 leh Nagaland team 1-0 in an hneh a, Assam team nen 1-1 in an inhneh tâwk. Group champion niin, semi final-ah BUKSS (Barak Valley journalist) 3-0 in an hneh a; February 4, Pathianni zan khan final-ah Manipur 3-1 a hnehin an champion a ni.

MJA team-te hi nimin khan Aizawlah an rawn haw a, MJA member ṭhahnem takin MJA president Vanlalrema Vantawl hoin Lengpui Airport-ah an lo hmuak a, tlaiah Aizawl Press Club-ah champion lawmna thingpui an inho nghal a ni.