Minister hoin Gas harsatna an thlir

Food, Civil Supplies & Consumer Affairs (FCSCA) minister John Rotluang­liana chuan, nimin khan a pisaah FCSCA depart­ment hotute ko khawmin, district ṭhenkhata eirawngbawlna gas-a harsatna sutkian dan tur leh thil pawimawh dangte an sawiho.

Meeting-ah hian, tun­laia district pali - Siaha, Mamit, Serchhip leh Cham­phai-ah te gas supply chung­changa MIZOFED-in harsatna an tawh mek sawiho a ni a; harsatna thlen chhan ber chu - Indian Oil Corporation (IOC)-in carrying contractor-te transportation rate an tihhniam lutuk vanga gas phur duh tur motor an hmuh zawh mang loh vang a nih thu tarlan a ni.

Harsatna sukiang turin FCSCA department chuan hma an la mek a, IOC hotute pawh an sawipui tawh tih an sawi a; tun dinhmunah chuan a theih ang angin district pali-ah hian gas phur thleng turin sorkar department motor-te pawh hmantir mek a nih thu leh, carrying contractor rawihna tur tender thar tihchhuah ṭêp a nih thu an tarlang.

Meeting-a an sawi danin, India ramah Food Secu­rity Act hman a nih avang­in, FSA hnuaiah state tinin State Food Commi­ssion an din tur a ni tih chu tipuitling turin Mizoramah pawh hmalak mek a ni a; Commission member turte thlan fel tawh a ni.

Meeting-ah hian FCSCA secretary HL Rochung­nunga, director Abhjit Vijay Chaudhari, joint director Andrew L Hnialum leh deptt. hotu dangte an tel.