World Cancer Day hman a ni
February 4 kha World Cancer Day a ni a, he ni pual hian nimin khan Mizoram State Cancer Institute (MCSI), Zemabawkah hman niin, Health minister Lal Thanzara'n a hmanpui a, Cancer Khualbûk (Shelter for Cancer Patients) sak thar a hawng.
Health Minister chuan, Mizoram chu mihring cheng aṭanga chhûtin India rama cancer vei tamna ber state a nih thu sawiin, "Tun hnaiah cancer ṭhenkhatah state dangin Mizoram rawn khûm mah se, cancer tam takah chuan sang ber nihna kan la hauh avangin a veiawm hle a ni," a ti a; cancer titlem tur leh a enkawlna lama hmasawn turin sorkarin nasa taka ṭan a lak thu a sawi.
Lal Thanzara chuan, India hmarchhaka state eng emaw zatin cancer enkawlna mumal an neih loh laiin, Mizoram chu kum 2003-ah cancer enkawlna changtlung Regional Cancer Centre (RCC) atana puan a lo nih tawh thu a sawi a, "Tunah Tertiary Care Cancer Centre (TCCC)-ah puan a ni leh tawh a, TCCC hi khawl changkang tak tak nena thuam, khum 100 awm theihna tura ruahman a ni," a ti.
Minister Lal Thanzara chuan, National Health Mission (NHM) hnuaia NPCDCS kaltlangin Population Based NCD Screening kalpui mek a nih thu a sawi a, "He hmalakna hnuaiah hian kum 30 chin chung lam zawng zawng chu cancer chi thum - chhûl hmáwr, hnute leh ka chhung cancer bakah, zunthlum leh BP sang an vei leh vei loh en chhuah vek tur a ni," a ti a; cancer, zunthlum, BP sang, lung natna, stroke-te tunlaiin a hluar tial tial avangin vei lo tura ṭan lak a ngaih thu a sawi bawk.
World Cancer Day hmanna hi NHM hnuaia National Programme for Prevention & Control of Cancer, Diabetes, Cardiovascular Diseases & Stroke (NPCDCS) leh Mizoram State Cancer Institute (MCSI) ṭangkawpin an buatsaih a ni.
Cencer vekte tana khualbuk sak thar hi UDPA department-in DAY-NULM hnuaia Scheme of Shelter for Urban Homeless Scheme kaltlanga a sak a ni a, cheng nuai 20 sêngin February 2, 2016 aṭanga August 29, 2017 chhung sak a ni. Khualbûk hi Mizoram Cancer Care Foundation (MCCF) leh Health department-in thuthlung an ziah angin, MCCF-in an enkawl zui ang.