Mipui leh NGO zahlo-ah Congress puh

ZNP president Lalduhoma chuan, Congress party sorkarin Bru chungchanga thil a tih dan chu Mizo mipui leh tlawmngai pawlte zahlohna a nih thu a sawi a, "Hnam pawi khawihna lian tak a ni," a ti.

Nimina ZNP pisaa inkhawmah thu sawiin Lalduhoma chuan, "February 2, 2018-ah Chief Minister chuan an party office-ah thu sawiin, Bru refugee camp-a awmte chu Congress-a lawm luh an tum thu leh Tripura sorkarin an phal loh vangin ṭhulh a nih thu a sawi a. He an thil tum hi Mizo mipui leh NGO zahlohna a ni," a ti a; Congress party chu hnam pawi khawih zawnga thil tih tumah a puh.

Lalduhoma chuan, kum 2014-a Lok Sabha inthlan dawnah NGO Coordination Committee-in Tripura-a Bru-te an camp-a vote thlaktir duh lohna an lantir tih sawiin, April 8, 2014-ah Chief Secretary-in Central YMA General Secretary hnenah lehkha thawnin, May 16, 2014 aṭanga thla thum chhungin Bru refugee-te Mizorama an lêt duh loh chuan Electoral Roll aṭanga paih turin Mizoram sorkarin hma a lak tur thu a hrilh tih a sawi a; "NGO Coordination Committee hmalakna leh duh dan hi ZNP chuan kan thlawp hle a ni,” a ti.

Central budget thar chungchangah Duhoma chuan, health care scheme thar ṭha tak duan a nih thu a sawi a; ZNP telna ṭangrual pawl ZPM pawhin Zoram mipui tan free investigation leh free medical treatment policy an duang tih sawiin, "A ṭul ang zelin Central scheme dungzuiin kan her rem zel ang,” a ti a; Central-a hotute leh mithiamte'n ZNP policy - hand-holding policy ang chi an tuipui hle niin a sawi.

ZNP President chuan, Aizawl khawpui vawnfai leh thianghlimna kawnga hmalakna chu AMC mawhphurhna a ni tih sawiin Lalduhoma chuan, "Tunlai hian Aizawl khawpui hmun hrang hrangah bawlhhlawh a inchhêk vûm hnér hnúr a, motor, sum leh mihring pawh an nei a, chuti chung chuan bawlhhlawh an thianfai hlei thei lo," a ti a; khawpui pakhat bawlhlawh pawh paih hleithei lote'n Mizoram pum bawlhhlawh an paih theih loh tur thu a sawi bawk.