Kan thawk hraw dawn - Zoramthanga

MNF president Zoramthanga chuan nimin khan an party pisa, Mizo Hnam Rûnah thu sawiin, "Kan ngaihtuah hraw a, kan thawk hraw ang a, kan thawkchhuak hraw bawk dawn a ni," a ti.

Zoramthanga chuan, "Mizo Nationalism humhalh a nih theih nan economic kulhpui kan siam a ngai a, economics-a kan intodelh chuan society nationalism te, religious nationalism thlengin humhalh a ni thei nghal dawn a ni," a ti a; Mizoram ei leh bara intodelh turin formula pathum - privatisation, mechanisation leh large scale production-te an hmang dawn niin a sawi.

MNF President chuan, Mizoram chu bial hlawm hrang hrang, a zau tê têa siamin, society enkawlnain an kal dawn tih a sawi a, "Society chuan anmahni bial (zau) ṭheuh an enkawl dawn a, hnathawktute mamawh tâwk ang zel fel taka chhût chhuakin ṭanpuina pek an ni ang," a ti.

Zoramthanga chuan, an sorkar hunah chuan buh, wheat leh thlai chîn bakah, ran vulh, vawk, bawng, ar vulh thlengin a tam tham law law thar chhuak turin society-te enkawlna hnuaiah kalpui a nih dawn thu te, mau leh ṭhelrêt hmunah a karah aloe vera an chîntir dawn thu te, agriculture link road siam chu an hmalakna hmasa ber a nih dawn thute a sawi a ni.

MNF party mite chu nationalist an ni a, nasa taka beihna tâwk ṭhin an nih thu sawiin Zoramthanga chuan, "Retheihna hlíngin min chhun a, retheihnain sazu ang maia a khela han ben chuan kan nationalist nihna a nêk ral leh mai ṭhin. Mizo nationalism humhalha humhim turin economic kulhpui kan siam a ngai... Economic kulhbing kan siam nghet dawn a, chu chuan kan society leh sakhuana kulhbing pawh a siam nghal dawn a ni," a ti.