ZPM Ṭhalaiin Bangladesh ramri an tlawh

ZPM Ṭhalai Gen.Hqrs hruai­tute chuan an president Malsawmzuala hoin June 2-3, 2020 chhung khan Tlabung chhehvela Mizoram leh Bangladesh ramri hungna (border fencing) an tlawh. Khawthlangtuipui Group YMA hruaitute nen June 2-ah an inkâwm a, June 3-ah ramri hungna leh Bangladesh nena inkalpawhna gate-te an tlawhho a ni.

ZPM ṭhalai hruaitute hian May 31, 2020-a Khawthlangtuipui Group YMA hruaitute'n Bangladesh aṭanga lo lut mi pathum an manna, border fen­cing gate no. 26 an tlawh. Ramri gate-te chu làwn liam awl takte a ni hlawm a, YMA-in hma la lo se chuan kalh mumal lohin a awm reng dawna an hmuh thu sawiin, "Border fencing tlawha kan kal hian km. 6 vel kan tlannaah BSF duty hmuh tur an awm lo," an ti a; chutih laiin BSF-te chuan chhun zan zawma duty angin an insawi tih an tarlang.

Lei (bridge) hnuai aṭanga awlsam taka Bangladesh aṭanga luh theihna hmun leh kilometer chanve dawn lai ramri hung lohna, awlsam taka Mizorama luh theihna hmunte an tlawh a; chu'ng hmuna YMA member, ramri vengtute an tlawh bawk.

Malsawmzuala chuan, Mizoram leh Bangladesh ramri hungna chu a him tâwk loa an hriat thu sawiin, "BSF duty-te kan ring zo lo a, tuna awm mek 60 BSF battalion-te lakah he laia Mizo awmte'n harsatna an tawh ṭhin avang leh an hnathawhah duhkhawp lohna tam tak a awm avangin an hotupa post commander Joy Sankar hi hmun danga sawn ngei ni se kan duh a, hma kan la dawn a ni," a ti.

ZPM Ṭhalai President chuan, ramri hungna awm lo leh venhimna awm lo laite leh luh rûk theihna awmte a hmuna enfiah turin Mizoram Home Minister leh sorkar thuneitute an ngen tih sawiin, "Changtlung leh him zawka siam a nih theih nan Central lam hotute pawh dawr turin kan ngen a ni," a ti a; ramri ven hna thawktu YMA-te hmalakna chu lawmawm an tih thu a sawi bawk.

ZPM ṭhalai hruaitute hian Khawthlangtuipui Group YMA hnenah tarpaulin, silpaulin leh surface disinfectant-te an pe a ni.