Mizoram-Assam ramrîa Assam khelmual laih enfiah

Mizoram leh Assam in­rina, Vairengte leh Lai­la­pur inkara Assam sor­karin khelmual a laih mek chu Vairengte SDO(Civil)-in a hmunah a enfiah a, Kolasib DC R Zarzo­sang­a hnenah a thil hmuh dante a thlen. Kolasib DC chuan report chu Mizoram sor­karah a thlen ve leh a ni.

Mizoram leh Assam inrinnaah hian state pahnih thuneitute chuan inráwn tawn hmasa lo chuan kut thlak loh ni se, tiin thu an lo dah tawh a; mahse, Assam lamin khelmual a lai mek tih hriat a ni.

Vairengte SDO(C)-in Kolasib DC hnena report a thlen danin, Assam-in khelmual an laih thu hi Vairengte V/C-te'n December 29, 2017-ah an hria a, an hriat veleh a hmunah kalin, Haiwaithang V/C-te nen an enfiah a ni. Lailapur-a Gram Panchayat-te'n Rs. 1,00,000 sêngin khelmual nawr rual leh a sîr nawr zauh hna an thawk a, Lailapur dái aṭangin khawl luh thlakna tur kawngpui sial a ni.

Lailapur leh Vairengte inkara Lailapur mi leh sa chhungkaw pangate an chen chungchang erawh enfiah a ni lo a; a ṭul anga Vairengte SDO enfiahtir a tum tur thu, Kolasib DC chuan Kolasib-a thuthar thehdarhtute a hrilh.