Police-in fimkhur turin mipui an chah

Mizoram Police-a public relations officer (PRO) chuan thuchhuah siamin, tunlaiin online-a sum peipunna awlsam tak ni anga lang, him si lo a awm nual tih a tarlang a; fimkhur turin mipui a chah.

Police PRO chuan, online hmangin direct marketing business model hmangin product mumal siam nei si loin downline member tur an zawng ṭhin tih a tarlang a, "Heng lakah hian mipui kan fimkhur hle a ngai. Company ṭhenkhat chuan virtual currencies/crytop-currency/bitcoin, etc. investment hlâwk tak ti angte'n an insawi a, e.g. Adwazo. A ṭhen chuan Paytm wallet, Freecharge, Mobikwik leh Airtel wallet anga sumdawnna hlâwk tak ti angte'n an insawi (e.g. EPC - Easy Pay Cash) a ni," a ti.

Police thuchhuah chuan, dan loa mipui sum khawn chu RBI Act, Company Act, MPID Act, etc.-in a phal lo a, a khuahkhirh tlat tih sawiin, "Dan angin an chungah action lak theih a ni," a ti a; The Prize and Money Circulation Schemes (Banning) Acts 1978 Section 3 pawhin sumdawnna felhlel tak, scheme-a pawisa chhûn luh/dawn tura member (downline, etc.) lak a khap tlat thu leh, chutiang thil tite chu kum thum thleng tàntir theih an nih thu a tarlang.