CD4 counting machine thar 3 tlangzarh

Health minister Lal Thanzara chuan, nimin khan Health Workers Training School conference room-ah National AIDS Control Organisation (NACO)-in Mizoram hnena CD4 Counting Machine pathum a rawn pek thar a hawng. Mizoramah HIV hrik pai, ART Center-a inziak lut tawh mi 12,000 vel an awm thu leh ART ei lai mek mi 6,623 an awm thu tarlan a ni.

CD4 Counting Machine-te hi Kulikawn Hospital, Mamit District Hospital leh Kolasib District Hospital-a hman tur a ni a, nimin vek khan damdawi-in pathumah hian thawn nghal a ni.

CD4 Count machine pathum hawn belh a nih hma hian Mizoramah CD4 count machine pathum chiah a awm a, Aizawl Civil Hospital, Lunglei Civil Hospital leh Champhai District Hospital-ahte dah a ni.

Health Minister chuan, CD4 count machine chu HIV positive-te taksaa natna dotu tam leh tam loh enna leh an damdawi eiin hna a thawk ṭha nge ṭha lo tehna a nih thu a sawi a, "CD4 count azirin an damdawi ei thlaksak a ngai ṭhin a. Hei vang hian HIV positive tawh phawt chuan thla ruk danah CD4 count an tihtir ngei a ngai a ni," a ti.

Lal Thanzara chuan, MSACS hmalaknain tunah chuan Mizoramah CD4 counting machine paruk a awm tawh dawn thu sawiin, "CD4 counting machine hi a man a to bakah, National AIDS Control Organization (NACO)-in phalna an pek a ngai a. State dang, mihring tam zawk leh indaih lo zawkte pek an nih loh laia Mizoramin pathum kan dawng hi a lawmawm hle a ni," a ti a; khawl tharte chu ṭangkai taka hman a nih a beisei thu a sawi.

MSACS project director Dr Lal­malsawmi Sailo pawhin thu sawiin, HIV hrik kai hmuhchhuah tawh leh la hmuhchhuah loh, ART damdawi ei lote chu Mizorama HIV tidarhtute an nih thu a sawi a, "Kan ram dinhmun en hian, kohhran pawhin HIV policy nget tak an neih a ṭul tawh a ni," a ti.