KHAWTHLIR

Heroin man
Excise & Narcotics department (END)-a Anti-Narcotics Squad leh Central YMA Kumpuan Committee-te chuan, nimin zing dar 1:10 khan Hualngohmunah heroin gram 73 leh a neitua puh Lalengliana (32) s/o Pahnianga, Khawzawl Kawnzar Veng nia in­chhál an man. Inhnam­hnawih dang pahnih - Zirliani (48) d/o Lian­khuma leh Vanlalrova (36) s/o Lalnunsanga, Tahan (Tawngphila) nia inchhal ve vete pawh nimin zing dar 2:45 khan Chhinga Vengah an man bawk.

Khawl hlan
Aizawl West-III bial­tu MLA Vanlalzawma chuan nimin khan a bial chhunga YMA branch pali hnenah oxygen concentration/generator pakhat ṭheuh a pe. Oxygen concentration/generator hlanna inkhawm hi Khatla South YMA Hall-ah neih a ni a; khawl hi MLA fund aṭanga lei niin, YMA branch pali - Khatla South, Nursery veng, Bungkawn Vengthar leh Lawipu-te hnenah hlan a ni.

Hindi free class
MZP leh 46th. Assam Rifles-te chuan kumin February thla aṭangin Hindi spoken free class an kalpui mek a; a duh apiang tan zir theih a nih thu MZP chuan an tarlang. MZP tarlan danin, Hindi spoken class hi ni tin tlai dar 3-5 inkarah neih a ni a, office hun chhungin MZP Office, Treasury Square-ah ngaihven theih a ni.

Thilpek sem
225 Bn. Central Reserve Police Force (CRPF) ­chuan February 5, Thawhṭanni khan civic action programme hnuai­ah Lengpuiah water filter, carrom board leh tui dahkhawlnate an sem. Thilpek hi 225 Bn. CRPF commandant Sanjeev Hampal-a'n a hlan a ni.

Zirlai lawmpui
Mission Foundation Movement (MFM) hnuaia Laithangpuii College of Pharmacy chuan February 5, Thawhṭanni khan Tourist Lodge, Chaltlangah graduate tharte lawmpuina hun leh lut thartte lawmna hun an hmang a, School Education minister H Rohluna'n a hmanpui. He college-ah hian graduate thar mi 15 leh zirlai thar 24 an awm a ni.