GAC campus thar humhalhin hnatlang

Govt. Aizawl College (GAC) zirlaite leh zirtirtute chuan nimin khan Mualpuia an college campus thar humhalh hnatlang an nei a; an college ram chhunga mimalin kut an thlak leh a hungna an siamte chu an tichhia.

GAC hnatlangah hian college principal Lalrinawma leh zirtirtu dangte bakah, zirlai ṭhahnem tak an tel a; GAC Principal sawi danin, Mualpuia an college ram chu April 23, 2012-ah Chief Minister leh kha tih laia Land Revenue & Settlement Minister ten GAC tan an pe a, LSC pawh an pe a ni. Ram chu mimal hnen aṭanga sorkarin a lei chhâwn tawh a nih thu a sawi bawk.

Govt. Aizawl College hian an hmun tharah hian Commerce building, cafetaria leh girls hostel-te an sa tawh. Chutih lai chuan, a chhak lam zawl, in dang sak lehna tura an tih chu Lalsangbera ten LSC panga an lo siam hnan a, anmahni ram anga cheibâwlin, an lo hung niin an sawi.

Nimina GAC zirtirtu leh zirlai hnatlangte hian Lalsangbera ten ram hungna tura ban an phun zawng zawngte pawt phawiin, an hâl nghal a, a hmunhma an sâm fai bawk.

GAC zirlaite chuan, an campus thar chu luah thuai an duh thu an sawi a; mimal tute emaw kuta a awm an remtih loh thu te, a panna kawng pawh sorkarin siamṭha thuai se an duh thute an sawi.

GAC Students Union leh GAC Staff Welfare Committee chuan thuchhuah inṭawm an siam a, "Kan ram chhungah mi tu pawh harsatna siam an awm chuan GAC Student Union leh Staff Walefare Committee ṭangkawp chuan na takin kan humhalh zel ang," an ti.

An thuchhuah chuan, "Sor­karin GAC hmun atana kum 2012 (LSC No. DLL 24 of 2012)-a ram min pe leh hemi tihpuitlinna atana sum ṭhahnem tak ruahmanna min siamsak hi kan lawm tak zet," an ti a; a hmun a panna kawng leh college building chu peihfel a nih thuai theih nan tun aia chak zawka hma laksak turin sorkar an ngen tih an tarlang bawk.

GAC campus thar awmna ram hi a hmain Zirtiri Residential Science College ram tura laih zâwl a ni tawh a, mahse, Zirtiri College hian Durtlang lamah hmun an neih avangin GAC hian an chang ta nia sawi a ni.