8th Schedule-ah Mizo ṭawng telh turin Mizoram sorkarin hma a la mek

Mizoram sorkar chuan India danpuia 8th Schedule-ah Mizo ṭawng telh a nih theih nan hma a la tawh ṭhin a, sorkar laipuiah ngenna a thlen tawh ṭhin. Tun hnai lawk - February 26, 2020 pawh khan Ministry of Home Affairs-ah lehkha a thawn leh bawk.

September 26, 2013 khan Mizoram sorkar chuan 8th Schedule-a Mizo ṭawng dah turin sorkar laipuiah a thlen tawh a, chu chu sorkar laipui aṭanga ngenna an dawn bawhzuina vang a ni. Sorkar laipuia Ministry of Home Affairs (MHA) Joint Secretary (HR) chuan May 10, 2013 tawh khan state leh union territory-a chief secretary zawng zawng hnenah lehkha a thawn a, 8th Schedule-ah India rama ṭawng chi hrang 22 a awm tawh thu te, ṭawng dang 38-in luh ve an duh mek thute ziah a ni.

Lehkhaah chuan, kum 2003 khan Sitakant Mohapatra kaihhruai Committee din a nih thu te, chutih lai aṭang chuan 8th Schedule-a lut turin tehfung fel tak a awm loh thu te, MHA-in Commitee a din chuan zau thei ang bera an zir chian tur thu te, MHA-in tehfung chi sarih a siam te, ṭawng hmangtu mi nuai nga an tling em tih te, zirna-in leh college-ah ṭawng chu hman a ni em tihte leh ṭul hrang hrangte chhân tur tarlan a ni bawk.

May 10, 2013-a MHA lehkha chu Mizoram sorkarin a chháng mai lo a, June 10, 2013 khan MHA joint secretary (NI) Dr RK Mitra chuan Mizoram Chief Secretary hnenah lehkha thawn nawn lehin, May 10, 2013-a lehkha a thawn tawh chu a chhànna a dil nghal.

Mizoram sorkar chuan September 26, 2013 khan MHA-ah chhanna a thawn a, Mizo ṭawng hmangtu chu mi 5,00,000 chuang an nih thu te, kum 50 chuang hman a nih tawh thu te, zirna-in hrang hranga hman a nih thu te, literary tradition-ah Mizo alphabet chu kum 1894-a hman ṭan a nih thu te, Mizoram chhung hnam hrang hrang awmte inbiakpawhna atan hman a nih thu tarlan a ni.

Chhannaah chuan, Mizo ṭawngin thu leh hla a tihhmasawn dan te, Mizoram chu India ramah ziak leh chhiar thiam tam lamah pahnihna a nih thu te, India ram chhiarpuiah ṭum thum - 1991, 2001 leh 2011 chhunga Mizoram dinhmun leh tunah Padma Shree award dawngtu mi 12 leh Padma Bushan dawngtu mi pakhat an awm tawh thute tarlan a ni bawk.

8th Schedule-a Mizo ṭawng telh chungchang chu kumin February-March thlaa Assembly budget session neihah khan MLA pathum - Dr ZR Thiamsanga, C Lalsawivunga leh Lalrindika Ralte ten zawhna inṭâwm (un­starred question) an nei a; chutah chuan India danpui 8th Schedule-a Mizo ṭawng telh ve tura sorkar hmalakna an zawt a ni.

Sorkar chhannaah chuan, 8th Schedule-a Mizo ṭawng dah a nih theih nan Mizoram sorkarin hma a lak thu te, September 26, 2013-ah MHA-ah thawn a nih tawh thu te, document pawimawhte pawh thawn a nih tawh thute tarlan a ni. 'Sorkar hian India danpui 8th Schedule huanga Mizo ṭawng thun lut tur hian nasa zawka ṭan lak tumna a nei em?' tih zawhna chu, "A ṭul anga hma lak zel a ni ang,' tia chhan a ni.