Rs. 10 thir a thi lo; hman theih a ni : SBI leh bank dangin Rs. 10 thîr dawng duh lo?

Reserve Bank of India (RBI) chuan tun hnai khan thuchhuah siamin, Rs. 10 thir (coin)-te chu a thi lo a, hman theih reng a nih thu a tarlang nawn. Hetih lai hian, Mizoramah chuan Rs. 10 thir hman theihna a váng tawh hle a, State Bank of India (SBI) leh bank ṭhenkhat dangte pawhin an dawng duh lo nia thu dawn a ni.

RBI thuchhuahin a tarlan danin, RBI hian Rs. 10 thir (coin) hi a chi hrang 14 a tichhuak tawh a, chu'ng a chi hrang 14-te chu a la nung vek a, tihthih a la awm lo. RBI-in a tihchhuah Rs. 10 thir reng reng, eng ang design pawh ni se, miin a nei a nih chuan hman theih vek a la ni.

RBI-in Rs. 10 thir a tihchhuah hmasak ber chu March 26, 2009-ah tihchhuah a ni a, chumi hnuah a chi hrang 14 tihchhuah tawh a ni. A chi dang tihchhuah hnuhnun ber chu June 29, 2017-ah a ni a, Shrimad Rajchandra pian champha kum 150-na puala siam a nih angin a laiah thlalak/lim dah a ni. Nikum vek khan April thlaah Rs. 10 thir chi dang tihchhuah a ni bawk.

Tun dinhmunah chuan India ramah Rs. 10 thir hi chi hnih lâr zual bik a awm a, a chi pakhat zawkah rupee chhinchhiahna a awm laiin, pakhat zawkah chuan a awm lo. RBI statement chuan, India rama bank zawng zawngte chu Rs. 10 thir dawng tur leh an branch tinte pawh dawng vek turin a hriattir a ni.

Aizawla RBI Sub-Office hotute pawhin zawhna chhangin, Rs. 10 thir leh pawisa thir dangte chu bank-ah pawh dah luh theih reng a nih thu an sawi.

Rs. 10 thir hman chungchangah mipuiin harsatna an tawh avangin RBI office chuan November 20, 2016 khan Rs. 10 thir a thih loh thu leh dan ang taka hman theih a nih thu hriattirna an tichhuak a; January 17, 2018 khan Mizorama bank hrang hrang hnenah Rs. 10 thir dawng tura an hriattir bakah, January 31, 2018-ah pawh State Level Banker Committee Convener SBI hnenah hriattirna an pe leh a ni.

Aizawla bank ṭhenkhat chuan anmahni enkawltu State Bank of India (SBI)-a Rs. 10 thir dah luh kawngah harsatna an tawk nia thu dawn a ni.

APEX Bank Main office-a chief manager Lalsawta Hmar chuan, an customer-te aṭangin Rs. 10 thir an la dawng reng a, mahse, an pek chhâwnna leh lak chhuahna ber SBI Main office-in an dawn duh loh avangin harsatna an tâwk tih a sawi.

Lalsawta Hmar chuan, Rs. 10 thir ringawt 4,00,000 vel an kawl mek tih sawiin, bank-in pawisa an kawl theih chin bithliah a awm si avangin pek chhuah theih loha kawl vak chu an tan thil buaithlak a nih thu a sawi a; a dahṭhatna tur hmun pawh an neih tawh loh avangin, an bank-a a hlâwma Rs. 10 thir dah luh tumte chu an dawnsak thei tawh rih loh thu a sawi bawk.

Dak-in hotute pawhin SBI Main office-in Rs. 10 thîr an dawn duh loh avangin harsatna an tawh mek thu an sawi. An sawi danin, Aizawla Head Post Office-ah hian Rs. 10 thir chu counter-ah tlem azawng an dawn bak chu a hlâwmin an dawng duh tawh rih lo a; tunah hian Rs. 10 thir ringawt 30,000 (Rs. 3,00,000) vel an kawl mek a ni.

Mizoram Rural Bank (MRB), Treasury Square Branch Manager pawhin, SBI-in Rs. 10 thîr an dawn duh loh avangin harsatna an tawk tih a sawi a; tunah hian Rs. 10 thir hlîr Rs. 50,000 vel an khawl tawh thu te, a dah khawlna an neih tawh loh avangin tunah chuan an dawn theih tawh loh thu leh, hmun danga MRB branch-te pawhin harsatna an tawh thute a sawi.

Aizawla sumdawng ṭhenkhat chuan, Rs. 10 thir chu bank-in an dawn duh loh avangin mipui aṭangin an dawng duh bik lo a, bank lamin dawng duh se chuan an dawn theih thu an sawi. Sumdawng pakhat chuan, Aizawla SBI branch pakhat an dawr ṭhin pawhin Rs. 10 thir an dawn duh loh ngei thu a sawi a ni.

Kohhran ṭhenkhat pawhin Rs. 10 thîr chu bank-a an dah luh theih loh avangin an mem­ber-te chu thawhlawm atan Rs. 10 thîr thawh rih lo turin an hriattir nia thu dawn a ni bawk.

Hetih lai hian, SBI Aizawl Main office-a assistant general manager Binoy Bhusan Das chuan, SBI-in Rs. 10 thir an dawng duh lo anga sawi chu a hriatpui loh thu leh, a hriat chinah dawn duh loh an neih loh thu a sawi thung a ni.

Aizawla RBI pisa hotute chuan, bank zingah Rs. 10 thîr dawng duh lo an awm a nih chuan, RBI-ah lungawi lohna thlen theih a nih thu an sawi a; dan bawhchhiate chu Aizawla RBI-in hrem nghal thei lo mah se, Guwahati-a hotu sang lamah an thlensak thei tih an sawi bawk.