KHAWTHLIR

Haulawngah NCDC Team
Haulawng khuaa rannung seh natna (scrub typhus) tun hnaia lêng zir chiang turin National Center for Disease Control (NCDC)-a mithiamte chuan vawiin hian Lunglei district-a Haulawng an tlawh dawn. NCDDC mithiamte hi investigation neihpui turin IDSP state nodal officer Dr Pachuau Lalmalsawma leh entomologist Lalfakzuala Pautu-te ruat an ni. Haulawngah hian kumin kum tir khan rannung seh natna hi a leng a, mi 70 chuangin he natna hi an kai a ni.

Kal khap
Traffic SP C Lalthanmawia chuan thupek chhuahin, vawiin aṭang hian PWD-in Bethlehem Vengthlang (Old Zoo Road) leh Armed Veng South (Mirawng Lui) inkar kawng siam hna an thawh dawn avangin, hna thawh chhungin mihring leh lirthei reng reng kal/tlan phal a nih loh thu a tarlang. Thupek hian March 2018 thleng a huam ang.

Sub-centre hawng
Chaltlang Lily Veng Health Sub-Centre sak thar chu nimin khan Health & Family Welfare principal director Dr F Lallianhlira'n a hawng. In sak nan hian Rs. 11,50,800 hman a ni a, June 5, 2011-ah sak ṭan niin, January 5, 2018-ah sak zawh a ni.

Luiah tla hlum
Nimin chhun dar 12 vel khan R Zorammawia h/o Tialsungi, Siaha chu Tuipui-ferry bul Chhimtuipui luiah a tla hlum. Thu dawn danin, R Zorammawia hi ramvâk tura kal a ni a, Chhimtuipui luiah hian chesual­in a tla hlum a ni.