Sorkar in tur sak hna thawktute MNF ṭhalaite'n an chawlhtir

MNF ṭhalaite chuan nimin khan New Secretariat Complex-a PHE Engineer-in-Chief office sak tuma kut thlak mek chu an tlawh a, ṭha an tih loh avangin JCB hmanga hna thawkte an chawlhtir.

MNYF-te hi an vice president Lalremruata Chhangte hoin mi 50 vel an thawk chhuak a, New Secretariat Complex-a sorkar hnathawkte chenna quarters, chhungkaw 18 luah ṭhin ṭhiat a, a hmuna PHE E-in-C pisa sak tum a ni chu an duh loh thu leh an tarlang.

Lalremruata Chhangte chuan, "Building awm sa ṭhiata sum tam tak senga sorkarin building sak tum hi ṭha kan ti lo a, kan dodal tlat dawn a ni," a ti.

MNYF vice president chuan, sorkar quarters Plot B-17 chu MNF sorkar laia sak niin, chhungkaw 18 an khawsa nia sawiin, "Engineer-te pawhin chenna tlaka an ngaih a ni," a ti a; in awm sa ṭhiat a, a dang sak tum chu minister ṭhenkhatin sum siam an tumnaa an ngaih thu a sawi bawk.

MNYF tarlan danin, quarters hi New Secretariat Complex Site Selection Committee-te October 9, 2013 meeting rawt ang leh GAD-in a pek dan chuan, PHE department-a Sewerage and Sanitation Circle office building atan tih a ni. GAD lehkhaa a lan danin, kum hnih chhunga in sak a nih loh avangin, June 9, 2015-a CS Conference Hall-a meeting chuan Plot B-17 bakah, B-19 nen kaikawpin PHE E-in-C pisa hmun atan a pe leh a; mahse, in awmsa ṭhiat lo tura tih a ni.

In awm sa ṭhiat loin PHED E-in-C building chu sak chi a nih loh avangin New Secretariat Complex Welfare Committee-in Chief Minister leh PHE Minis­ter hnenah fimkhur zawka enkawl turin an ngen a; June 21, 2017-a Chief Secretary hoa Site Selection Committee meeting chuan PHE hnena ram a pek tawh chu an sût a ni.