Integration Tour-a telte Larsapin a kâwm
Assam Rifles 23 Sector bultuma Mizo zirlai National Integration Tour-a kalte chu nimin khan Governor Lt.Gen. Nirbhay Sharma-a'n Raj Bhavan-ah a kâwm.
Governor chuan, Assam Rifles-in remhre taka thingtlang kilkhâwr zawka chêng zirlaite tan a thlawna India ram khawpui fang tur leh India rama mi pawimawh ber berte hmuhpuia an hruai chu lawmawm a tih thu a sawi a; zirlaite chu an zin chhunga an thil tawnah thil ṭha leh tha vak lote pawh a awm thei a, an thil tawn apiang chu an nunah a
ṭha zawnga zirlai ṭha taka chantir turin a chah.
Larsap chuan, an zin chhunga an thil tawn hrang hrangte a zawt a; zirlaite aiawhin mi pahnihin an chàm chhunga an thil tih leh an tawnhriatte Larsap an hrilh.
Assam Rifles 23 Sector hian kumin January 21 aṭanga February 8 chhung khan Mizo zirlaite tan Delhi khawpuiah National Integration Tour-a an buatsaih a; Aizawl, Lunglei, Champhai leh Serchhip district aṭangin pawl 8-10 zirlai mipa leh hmeichhia pakua ve ve bakah, zirtirtu pahnih an kal a ni.
National Integration Tour-a kalte hian Delhi-a an chàm chhungin hmun pawimawh tak tak an fan bakah, Republic Day lawmna New Delhi-a neihah an tel a, India President Ramnath Kovind chu January 31 khan Rastrapati Bhavan-ah an hmu bawk.