Ayush Hospital-ah mi 13,163 inentir tawh
AYUSH Hospital, Thenzawlah August 2016-a a hawn a nih aṭanga January 2018 thleng khan mi 13,163 an inentir tawh a, damlo mi 68 admit tawh an ni.
Resident medical officer Dr HT Zothanmawia sawi danin, Ayush Hospital-a inentir tawh mi 13,163 zinga 7,248 chu hmeichhia an ni a, 5,915 chu mipa an ni. Kum khat leh thla nga chhung hian damlo mipa 31 leh hmeichhia 37, an vaiin mi 68 admit an ni tawh a; damdawi-ina awm zinga mi pahnih chu an thi tawh a ni.
Ayush Hospital-ah hian damdawi a thlawn veka sem/pek chhuah a ni a, a din tirh aṭanga kumin January thla tawp thlengin damdawiah harsatna lian tham an tawk lo a, damlo hnena damdawi pek turah chatlak a la awm lo niin an sawi.
Integrated Ayush Hospital-ah hian resident medical officer pakhat, medical officer paruk (ayurvedic doctor leh homoeopathic doctor pathum ve ve), nurse 12 leh thawktu dang 30 an awm a ni.