Petrol leh gas tichingpentu man

Central YMA hnuaia Vigilance Sub-Committee leh Kawnpui police-te chuan tun hnai khan petrol leh gas tihchingpen eng emaw zat an man a, Kawnpui Police Station-in thubuai an siamsak.

CYMA Vigilance Sub-Committee leh Kawnpui police ṭang­kawpte hian petrol tihchingpenna truck pakhat leh eirawngbawlna gas tihchingpenna truck pathum an man a, lirthei khalhtute pawh an man nghal. YMA hruaitute chuan Food, Civil Supplies & Consumer Affairs director Dr Lalhriatzuali Ralte an be nghal a, petrol leh tuialhthei tihchingpen a reh theihna atan theihtawp an chhuah tur thu a lo hrilh.

Hnam dangte dan loin ngampa taka an chêt ngam loh thu CYMA Vigilance Sub-Committee secretary HF Lalrinpuia chuan Vanglaini a hrilh a, "Hnam dangte hi kan Mizopui ngeiin an thurualpui vanga dan loa che ngam an ni. Hnam dangte thurualpui lo turin Mizo mipui kan ngen a ni," a ti.

CYMA Vigilance Sub-Committee hian COVID-19 vanga Vairengte checkgate-a khualzinte'n harsatna an tawh chungchang pawh an enfiah a, Kolasib Additional DC, Vairengte SDO (Civil), Kolasib Chief Medical Officer, Vairengte Police OC leh Vairengte Joint YMA-te nen inkâwmin, hmun palia screening nei turin ruahmanna an siam nghal a ni.