COVID-19 chungchanga thu dik lo thehdarhtu mi 14 man an ni tawh
Mizoram Police Media Cell chuan thuchhuah siamin, Coronavirus (COVID-19) chungchanga social media-a thu dik lo thehdarhtu mi pathum man belh a nih thu an tarlang. Heti hian COVID-19 kaihhnawiha thu dik lo thehdarhtu mi 14 man an ni tawh.
Police thuchhuah tarlan danin, March 12, 2020 khan, 'Tun mai khan Aizawl veng pakhata mipa naupang kum 13 mi chu Coronavirus a vei tih an hmu chhuak,' tih leh, 'Thla hmasa a test tura an thon kha a nia, voin ah a result a lo thleng ciah a, amah hi a pa hnathawhna vanga phaia awm an nia,' tih thu Whatsapp-ah thehdarh a ni. He thu hi police-te chuan an chhui nghal a, thu dik lo a nih thu an finfiah.
Police-te chuan thu thehdarh hmasatu leh a hnua thawn chhâwng lehtu mi pathumte chu March 12 khan an man a; Aizawl Police Station-ah IPC Section 505(1)(b) hmangin thubuai ziah luh a ni. Police-te chuan March 9, 2020 khan Aizawlah COVID-19 vei an awm thu social media-a thu thehdarhtu mi 11 an lo man tawh a, Vaivakawn Police Station-ah thubuai an ziah lut a ni. Police thuchhuah chuan, "Mipui rilru tithlabár thei dâwt thiI leh thu dik chanve hmanga thu thehdarh hi thil pawi tak a ni a, thubuai neih theihna a ni," an ti a; fimkhur turin mi tin an chah.