KHAWTHLIR

March 15, nimin Pa­thianni khan Mizoram Presbyterian Kohhran chuan Chanchin Ṭha Thlen Ni an hmang. He ni pual hian tualchhung kohhran hrang hrangte chu an inkhawm a, Mizoram Synod aṭanga thupui thlan an ngaithla. Thupuite chu - chawhnu inkhawmah 'A chanchin la hrilhna ngai loh mite hnenah' tih a ni a, zan inkhawmah 'Ka thuhretute in ni ang' tih a ni. Chanchin Ṭha Thlen Ni hi Mizorama Pathian thu hril hmasa bertu Rev. William Williams-a'n kum 1891-a Mizoram a rawn thlen champhaah hman ṭhin a ni.

Mission Vengthlang Branch KṬP chuan March 14, Inrinni khan an Kohhran Hall-ah blood donation camp an huaihawt a, Synod Hospital tan thisen unit 50 an pe a, a petute mipa 42 leh hmeichhia pariat an ni.

Coronovirus (COVID-19) léng vanga ei leh bar kawnga hlauhthawmna awm thei chungchangah Lunglei District Civil Supplies Officer (DCSO) chuan Lunglei district pumpuiah March thla quota tur buhfai a awm thu leh hlauhthawnna tur a awm loh thu a tarlang. DCSO chuan, "Lunglei FCI kudamah April thla quota daih stock a awm sa," a ti.

March 13, 2020 chaw­hnu dar 2 vel khan Siaha district Amotla khuaa mi C Khuaiduna (83) chu an huan hâlnaah chesualin a kâng hlum. Thu dawn danin, C Khuaiduna hi a nupui nen an hmarcha hmun tifaiin an kal a, tuikhura a nupui inbual hlânin huan a hâl a, chesualin meiin a kâng hlum ta nia hriat a ni. Chawhnu dar 3 velah a ruang hmuh a ni a, a kê chu hruiin a lo vêt a ni.

Information & Public Relations (IPR) department huaihawtin March 13,  Zirtawpni khan Lunglei district MJA member-te'n an district-a SEDP hnuaia hnathawhte a hmunah an enfiah.