COVID-19 chungchang inzirtir a ni
March 14, Inrinni khan Mizoram district hrang hranga Health department hotu, chief medical officer (CMO)-te pualin Health Services directorate conference hall-ah COVID-19 chungchang zirhona buatsaih a ni.
Health department chuan, 'COVID-19 laka inven nan leh fimkhur thu hlaah mi tu pawh, khawsik, hritlang, khuh leh thâwkna lama harsatna neite chu sikul, college, bazar, biak-in leh puipunna hmuna kal lo a, mahni in emaw, damdawi-inah emaw inenkawl tura ngen leh hriattir kan ni e,' an ti.
Training hi National Health Mission (NHM) mission director Dr Eric Zomawia'n a kaihruai a; Health principal director Dr F Lallianhlira chuan, Mizoramah COVID-19 vei hmuh la ni lo mah se, khawvel ram hrang hrangah nasa taka a darh tawh avangin fimkhur a ṭul thu a sawi.
Dr F Lallianhlira chuan, Health department-in COVID-19 laka invèn nan Lengpui Airport-ah uluk leh fimkhur takin ni tin screening tih a nih thu sawiin, "Sample lakna tur hmunhmá pawh Aviation lam thuneitute nen thawkhoin Lengpui Airport-ah room âwl ruahman a ni tawh. Khualzin zinga he natna kai rinhlelhawm, home quarantine ti thei lo tura ngaihte tan quarantine (dah hranna) hmun siam a ni," a ti.
Mizoram ramri hmun hrang hrangah khualzin Mizorama lutte endikna kalpui mek a nih thu sawiin F Lallianhlira chuan, "Tih fuh tâwk loh leh thawm ṭhat ngaihna laiah pawh hmalak nghal zel a ni a, theihtawp chhuah mek a ni," a ti a; thawktu indaih lohna karah mumal leh ṭha zawka COVID-19 laka mipui him theih nan thawktute siam rem a nih thu a sawi.
Training-ah hian district hrang hranga chief medical officer (CMO)-te leh district hospital-a medical superintendent-te'n an bial chhunga hma an lak dan leh rawtna an neihte an sawiho a ni. WHO-in March 6, 2020-a New Delhi-a Training of Trainers a buatsaiha telte leh Rapid Response Team member-te'n training an neihpui bawk.
Training-a telte hian COVID-19 chungchanga an thil zir leh hriatte chu an awmna district ṭheuha Health department hnathawkte leh mipui an zirtir chhawng leh dawn a ni. IDSP state nodal office Dr Pachuau Lalmalsawma chuan, Lengpui Airport leh screening tihna hmun hrang hrangah hmaih palh awm lo tura hmalak a nih laiin, COVID-19 lênna hmun aṭanga Mizorama lo hawte zingah endik hmaih palh an awm a nih chuan call center no. 102 leh 0389-2323336, 2318336-ahte engtik lai pawhin hriattir theih a nih thu a sawi.
Dr Lalmalsawma chuan, COVID-19 laka him turin fimkhurna leh chêt thianghlimna turte a sawi a; ṭulna bik tak neite tan lo chuan zin chhuah rih loh a ṭhat thu sawiin, mipui chu pun khawmna lama kal tam lo turin a chah. Sorkar leh private damdawi-in zawng zawnga damlote kan danah fimkhur a ṭul thu sawiin, "Chhungte hnaivai tak tak leh damlo tana ṭangkaina tak nei si lote chu damlote kan thuah insûm rih a ngai," a ti bawk.