Beisei angin sum kan la hmu rih ; Ruahman sa loah hmanna a tam - Finance Commissioner
Finance commissioner Vanlalchhuanga chuan, sorkar laipui aṭangin kum 2021-22 budget-ah beisei angin sum an la hmuh rih thu Vanglaini palai zawhna chhangin a sawi a, "Ruahman sa ni loa sum hmanna a tam thung," a ti.
Vanlalchhuanga chuan, sorkar laipui aṭanga Mizoramin sum a hmuhna pui pahnih - Post Devolution Revenue Deficit Grant leh sorkar laipuia chhiah tlingkhawm state-a sem (Share of Central Taxes)-ah beisei zat sum an la hmu rih tih a sawi a, "Sorkar laipui hian chhiah a hmu ṭha a ni mai thei, Share of Central Taxes-ah phei chuan beisei aia tam sum kan hmu," a ti.
Share of Central Taxes chu tun hnai thla thumah a hma thla thum aiin an hmuh ṭhat zawk thu sawiin Vanlalchhuanga chuan, "Mahse, chhiah luh tam danah kan hmuh tur a innghat thui lutuk a, kan hmu ṭha chhunzawm zel ang em tih sawi lâwk theih a ni lo," a ti a; chhiah a luh ṭhat chuan beisei aia tam hmuh theih a nih thu a sawi.
Kum 2021-22 Mizoram budget-ah Share of Central Taxes aṭangin cheng vbc. 3,327.82 leh Post Devolution Revenue Deficit Grant aṭangin cheng vbc. 1,790 hmuh beisei a ni.
Finance Commissioner chuan, state GST-ah beisei ang hmuh phak loh a hlauhawm thu sawiin, "Covid-19 avanga inkhuahkhirhna hrang hrang siam avangin sumdawnna a châwl a, chuvangin, beisei ang chhiah kan la hmu lo. Boruakte a ziaawm chhoh chuan beisei zat pawh kan hmu lo ang tih a sawi lâwk theih loh," a ti.
Kum 2021-22 budget-ah state-in chhiah aṭanga a thawh chhuah tur State Own Tax Revenue (SOTR)-ah cheng vbc. 719.56 ruahman a ni. Kum 2020-21 khan SOTR-a ruahman vbc. 661.69 chu khûm a ni a; SOTR-a sum hmuhna hlâwm lian ber chu GST a ni.
Ruahman lâwk ni loah sum hman a tam thu sawiin Vanlalchhuanga chuan, "Covid-19 avangin ruahman lâwk loa sum hman a tam lo thei lo. Hriselna leh nunna ngaih pawimawh hmasaka kan neih avangin thil ṭulah chuan kan pe zel. Hei vang hian kan beisei angin central aṭangin sum hmu mah ila, kan sum dinhmunin a tuar lo thei lo," a ti.
Finance Commissioner chuan, kum 2020-21 anga Covid-19 atan bik fund hmuh leh an inbeisei thu sawiin, "National Health Mission lamin DPR an buaipui a, hmuh theih ngei kan inbeisei. Sum hmuh a nih pawhin, Covid-19 kaihhnawihah chiah hman theih a ni dawn," a ti a; Covid-19 atan bik sum hmuh a nih chuan Covid-19 kaihhnawiha state sum hman a hek loh sawt tur thu a sawi.