Ramri atan MEOU-in JCB an thawh

Mizoram Earthmovers Owners Union (MEOU) chuan Mizoram leh Assam ramria kawng laihna atan an JCB-te an thawh a; nimin khan Chuhvel, Mamit district ramah kawng laih hna thawh ṭan a ni.

Vanglaini palai zawhna chhangin MEOU president Lalmuansiamkima chuan, ram leh hnam tana an tih ve theih tawka ngaiin an JCB-te chu ramria kawng laihna atan an thawh tih a sawi a, "Sorkarin a tih theih loh vang lam a ni lo a, kan tih ve theih tâwkah kan ngai. DC-te'n ruahmanna siamin, a ṭul anga hman atan JCB kan thawh a ni," a ti.

Lalmuansiamkima chuan, ramria buaina awm meka sorkar thâ tichak turin an JCB leh Hitachi-te thawh chhuahpui an inhuam reng thu sawiin, "Ram leh hnam thilah chuan engtik lai pawhin chêt chhuah kan inhuam," a ti a; DC-te nen ruahmanna an siam angin ramria kawng lai turin JCB paruk an thawh chhuahpui nghal thu a sawi.

MEOU-in JCB an thawhte chu Aizawla mi pali leh Mamita mi pahnih a ni a, JCB pali chuan nimin khan Chuhvel rama Mizoram police-te awmna thleng kawng sial tlang turin hna an thawk nghal. JCB pahnih chuan Phaisen, Kolasib district-ah hna an thawk thung dawn a, nimin khan Kolasib an pan.

JCB-in kawng a laihnaah hian a thlawnin an hmantir a, diesel man erawh chu Mizoram sorkarin a tum dawn a ni.