Covid-19 vei enkawl mek zatah India ramah Mizoram a sang fál

India rama state leh union territory zingah Mizoram chu Covid-19 vei enkawl mek percentage san lamah sang ber niin a sang fál hle. Hripui vei hmuh tawh aṭanga tehin thihpui tawh zatah erawh a hniam ber dawttu a ni thung.

July 20, 2021 thlenga swab sample endik, chhuahtir leh Covid-19 vanga thi tawh zat sorkar laipuiin nimina a tarlan danin, Mizorama hripui vei enkawl mek (active case) 6,833 chu positive hmuh tawh zat 29,020 aṭangin 23.55% a ni a, Mizoram hnaih bertu Manipur chu 11.61% a ni.

Active case percentage san zawngah Mizoram chu 20% chung lam awm chhun a ni a, 10% chung lam state dang pahnih awmin, Manipur bakah, Sikkim 10.35% a ni.

Heng state pathum bakah hian, active case 3% chung lam state paruk an awm a; chungte chu - Arunachal Pradesh 9.89%, Meghalaya 6.94%, Tripura 5.81%, Nagaland 4.32%, Assam 3.19% leh Kerala 3.98% a ni.

Active case zatah chuan India rama state leh UT 36 zingah Mizoram aia tamna state 10 chiah a awm tawh a; chu'ngte chu - Kerala (1,26,894), Maharashtra (97,932), Tamil Nadu (26,717), Karnataka (26,279), Andhra Pradesh (23,843), Odisha (17,880), Assam (17,597), West Bengal (12,509), Manipur (10,067) leh Telangana (9,787)-te a ni. Heng bak state leh UT dang zawng chuan Mizoram aiin active case an nei tlem zawk.

July 20 thlenga Mizorama Covid-19 vei hmuh chhuah tawh zawng zawng chu 29,020 a ni a, hei hi kum 2011 chhiarpuia mihring zat aṭanga chhûtin 2.64% a tling. July 20 bikah hripui vei mi 725 hmuh chhuah a ni a, Mizoram aia hmuh chhuah tamna state pakua chiah awmin, a bak state 19 leh UT pariatte chu Mizoram aia hmuh chhuah tlemna vek an ni.

Covid-19 vanga thi zatah erawh chuan Mizoram dinhmun a ṭha a, hripui vei zinga 126 thi tawhin chu chu 0.43% a ni a, Mizoram aia percentage hniamna awmchhun chu Dadra & Nagar Haveli and Daman & Diu (UT) chiah a ni. Thi zat (number) Mizorama aia tlemna pawh DNHDD (pali) leh Lashadweep (49) chiah an awm bawk.