Vankal Solar Power Plant-ah Thawh tur 80% thawk zo tawh

Kawlphetha megawatt 20 pe chhuak thei tura duan, Vankal Solar Power Plant, Khawzawl district-a mi chu hna thawh ngai zat aṭanga 80% vel thawh zawh a ni tawh a, Covid-19 léng avangin hna thawh zawh hun tur hriat a ni lo.

Power & Electricity department hotute chuan Vanglaini palai zawhna chhángin, Vankal Solar Power Plant atan hna thawh ngai 80% vel an zo tawh tih an sawi a, "Civil work kan zo tawh a, a hung hna te, modules dahna tur leh sub-station turte kan siam zo tawh a, thil eng eng emaw buaipui tur a la awm nual thung," an ti.

PE department hotute chuan, Covid-19 hripui léng avangin hna thawktute'n an thawh hleih theih loh thu leh power plant chu hman ṭan theih hun tur sawi lâwk theih a nih loh thu an sawi bawk.